Ukraina Prezidenti, Ukraina Arbiy Quvetleriniñ Baş komandanı Petro Poroşenko Donetsk ve Zaporijya vilâyetlerine iş ziyareti çerçivesinde ukrain ordusınıñ ve başqa arbiy kücleriniñ Azaq deñizinde imkânı olğan Rusiye istilâsına qarşılıq kösterüvge azırlıqnı teşkermek maqsadınen arbiy poligonda keçirilgen deñiz yalısını mudafaa etüv boyunca çeşit türlü arbiy quvetlerniñ taktik talimatlarını teşkerdi.

Talimatlarnı seyir etüvden soñ Petro Poroşenko arbiyler bügün ‘‘qattı on eki baa alğanlarını’’ qayd etti ve talimatlarda iştirak etken komandanlar ile arbiy bölükleriniñ askerlerine öz minnetdarlığını bildirldi.

‘‘Şunı da qayd etmek isteyim ki, bularnıñ episi piar degil ve birevni qorqutmaq içün yapılmay. Bu, ordumıznıñ cenkke azırlığını muntazam tarzda qurğan kündelik iştir. Ve bu cümleden, deñizden kelgen tecavüzge qarşılıq kösterüvge azırlığımıznı teşkerüv.

Prezident arbiy talimatlarnıñ ‘‘Eniş içün uruş’’ ve ‘‘Manevrli mudafaa’’ adlarını taşığan birinci ve ekinci basamaqlarını seyir etti.

Arbiy talimatlarda Ukraina arbiy-deñiz quvetleriniñ ve Qara quvetleriniñ deñiz piyadesi, yalıdaki topçılar, arbiy ava hızmetleri ve tank bölükleri iştirak ete. Talimatlarda Ukraina Milliy Gvardiyasınıñ ve Ukraina sıñır hızmetiniñ bölükleri de Ukraina Arbiy Quvetleri ile sıqı işbirlikte buluna. Umumen olaraq talimatlarda 600 asker ve 150 adet tehnika iştirak ete.

Talimatnıñ maqsadı, ukrain ordusınıñ ve flotınıñ  başqa silâlı küçler ile beraberlikte Azaq deñiziniñ yalısına imkânı olğan duşman enişine qarşılıq kösterüvge azırlıqnı teşkermektir.

Ukraina Arbiy Quvetleriniñ Baş komandanı talimat merkezinde operativ muşavereni keçirip, Ukraina Silâlı Quvetleri Baş ştabınıñ yolbaşçısı, ordu generalı Viktor Mujenkonıñ ve Devlet sıñır hızmetiniñ yolbaşçısı, general-polkovnik Petro Tsigikalonıñ Qara ve Azaq deñizlerinde telükelerge qarşılıq kösterüv boyunca Ukraina Milliy Havfsızlıq ve Mudafaa Şurasınıñ qararlarını yerine ketirüv boyunca esabatlarını diñledi.