2018 senesi saban ayınıñ (mart) 12 künü Ukraina devletiniñ başlığı Avropa Komissiyasınıñ Prezident yardımcısı, Avropa Birliginiñ tışqı işler ve havfsızlıq siyaseti boyunca Yüksek Temsilcisi Federika Mogerini ile körüşüvinden soñ jurnalistlernen körüşken arada Ukraina vaqtınca işğal etilgen topraqlarda keçirilgen Rusiye Prezidenti saylavlarınıñ neticelerini tanımağanını ve iç bir vaqıt tanımaycağını qayd etip, bu ceryannıñ teşkil etilüvine alâqası olğan er keşke qarşı sanktsiyalar kirsetmege çağırdı.

‘‘İşbu kelecek bazar künü olacaq prezident saylavları munasebetinen rusiyeliler sözde rey berüvni vaqtınca işğal etilgen topraqlarında da keçirmege istegeni içün Ukraina bu feyk prezident saylavlarını tanımaycağını men açık-aydın beyan etken edim. Qanunsız savlav ceryanınıñ teşkil etilüvine alâqası olğan adamlarğa qarşı sanktsiyalar kirsetmege kerek olğanında eminmiz’’, – dep qayd etti Petro Poroşenko.

Devlet başlığı aytqanlarına köre, Federika Mogerini ile körüşüvniñ büyük qısımı vaqtınca işğal etilgen Qırımda ve Aqyar şeerinde feyk RF prezidenti saylavlarınıñ keçirilüvine qarşılıq kösterüvge bağışlanğan edi.

‘‘Bu qanunsız sözde saylavlarğa qarşılıq olaraq Avropa Birligini de aynı areketlerni yapmağa çağırdım. Bundan da ğayrı, Rusiye tarafından serbest demokratik dünyağa, bu cümleden, AB ve Ukrainağa qarşı yapılğan haker ücümleri, saylav ceryanlarına kirişüv kibi areketler sebebinden, kiber telükelernen ve feyk haberlernen küreşte işbirligimizni quvetleştirmege añlaştıq’’, – dep haber etti Petro Poroşenko.

Avropa Komissiyasınıñ Prezident yardımcısı, Avropa Birliginiñ tışqı işler ve havfsızlıq siyaseti boyunca Yüksek Temsilcisi kene de hatırlattı: Avropa Birligi Qırımnıñ qanunsız ilhaqını tanımay.