Mustaqillik Kününe bağışlanğan tedbirler çerçivesinde Ukraina Prezidenti Volodımır Zelenskıy qırımtatar asıllı ukrain yırcısı Jamalanı III derece Printsessa Olga nişanınen taqdirledi. Bu orden – cemaat faaliyetiniñ çeşit saalarında kösterilgen büyük yararlıqlar içün qadınlarğa berilgen devlet mukâfatıdır.

Hatırlatamız, bu sene Jamala Grammy muzıka mukâfatını bergen Amerika davuş yazıp aluv akademiyasınıñ azası oldı. Qırımtatarlarnıñ sürgünligine bağışlanğan “1944” yırı ile “Eurovision-2016” yarışında ğalebe qazanması, Ukraina halq artisti unvanını qazanması ve “Qırım” albomı içün Taras Şevçenko adına Milliy mukâfatnı alması ise yırcınıñ icadiy ayatında eñ parlaq yararlıqlar arasında yer almaqta. “Eurovision” yarışında ğalebe qazanğan soñ yırcı halqara meydançıqlarda faal şekilde Ukrainanıñ menfaatlarını qorçalay. Qırımtatar halqınıñ temsilcisi olaraq, Jamala qırımtatar medeniyetiniñ ilerilemesine büyük isse qoşa ve halqara platformalarda Ukrainağa qoltuta, hususan, büyük hayriye tedbirlerine qoşula.

Qırımlılarnıñ, hususan tamır halqlarnıñ devlet seviyesinde tanılması ukrain cemiyeti içün pek müimdir. Temsilcilik adından Jamalanı nişan almasınen can yürekten hayırlaymız, yırcığa yañı muvafaqiyetler ve eñ esası – tuvğan Qırımnıñ azat etilmesini tileymiz!