Ukraina prezidenti Volodımır Zelenskıy, NATO sammiti olıp keçken AQŞ-qa ziyareti vaqtında, Vaşingtonda Prezident fondunda ve Ronald Reygan institutında çıqışta bulundı. Amerikalı bir jurnalistnen intervyü vaqtında Ukraina cenkni toqtatsa, Qırım aqqında Putinnen muzakere etecekmi, degen sualge Zelenskiy rusiye diktatorı Qırımda, atta Donetsk ve Lugansk vilâyetlerinde toqtamaycağını, tecavuzını devam etecegini ve tek küç toplamaq içün vaqıt qazanmaq istegenini ifade etti.

“Qırım aqqında aytqanda, oña teneffüs kerek. Onda 2014 senesi işğal etilgen Qırım bar edi. Toqtadımı? Yoq. Soñra Donetsk ve Lugansk vilâyetleriniñ qısımlarını işğal etti. Şimdi oña tek Qırım ve Donbass kerek olğanını ayta, tek bu. O yalancı, çünki onıñ elinde Donbassnıñ bir qısmı kibi Qırım da bar edi, amma o, ep bir tam miqyaslı istilâ başladı”, — dep qayd etti Prezident.

Bundan da ğayrı, Prezident rusiye iç bir vaqıt toqtamaycağını, tek daa çoq küç toplamaq ve demokratik dünyağa qarşı cenkni kene başlamaq içün bir teneffüs yapmaq istegenini qayd etti.

“O er vaqıt dünyanı bölmek, Amerikanı bölmek, Avropa memleketlerini bölmek içün fırsat bekley, birlikten qorqa. Oña teneffüs kerek”, — dep qayd etti Volodımır Zelenskıy.