2026 senesi martnıñ 2-nde Ukrayina Prezidenti Volodımır Zelenskıy İslâm dinini kütken ukrayin arbiyleri, qırımtatar halqınıñ Meclis vekilleri, Ukrayinada faaliyet köstergen tış diplomatik müessiselerinen diplomatlarnen beraber keçken iftarda iştirak etti.
İftar – 2023 senesinden başlap Ukrayina Prezidentiniñ teşebbüsinen musulmanlar içün muqaddes Ramazan ayında devlet seviyesinde keçirilgen tedbirdir. Bu sene tedbir Qırım musulmanları Diniy İdaresinde olıp keçti.
İftarğa Ukrayina Prezidentiniñ Qırım Muhtar Cumhuriyetindeki Daimiy Temsilcisi, Olga Kurışko, Prezident Ofisiniñ yolbaşçısı, general-leytenant Kırılo Budanov, Prezident Ofisi yolbaşçısınıñ muavini Sergiy Kıslıtsâ, Prezident Ofisi yolbaşçısınıñ muavini Pavlo Palisa, Prezident Ofisi yolbaşçısınıñ muavini Olena Kovalska, Ukrayina tış işler naziri Andriy Sıbiga, Ukrayina içki işler naziri İgor Klımenko, Ukrayina veteranlar meselelerinden nazir Nataliya Kalmıkova, Ukrayina milliy havfsızlıq ve mudafaa şurasınıñ kâtibi Rustem Umerov, Qırım Muhtar Cumhuriyeti ve Aqyar şeeri Prokuraturasınıñ reberi Nariman Suleymanov, Ukrayina halq deputatı Tamila Taşeva; qırımtatar halqınıñ lideri Mustafa Cemilev; Ukrayina etnosiyaset ve vicdan serbestligi boyunca devlet hızmetiniñ başı Viktor Yelenskiy; Milliy Meclis reisi Refat Çubarov; “Umma“ Ukrayina musulmanları Diniy İdaresi Müftisi Şeyh Murat Suleymanov ve digerleri qoşuldılar.
Ukrayina Prezidenti Volodımır Zelenskiy ukrayin musulman cemiyetine ve Ramazannı qayd etken bütün vatandaşlarğa muracaat etti. O, bu künniñ ötkerilmesiniñ emiyetini ayrıca qayd etip, Ukrayinanıñ işğal altında olğan insanlar aqqında unutmağanını ve vaqtınca işğal etilgen topraqlarından, şu cümleden Qırımdan da vazgeçmeycegini qayd etti.
“Biz Rusiyege Ukrayinağa ait iç bir şey bağışlamaycaqmız. Bu bizim printsipial nazar noqtamız – ve bu tek Ukrayinada birisiniñ degil, tek devletniñ degil, millionlarnen insanlarnıñ nazar noqtasıdır”, – dep, qayd etti Prezident.
Bundan ğayrı, Volodımır Zelenskıy şimdi telüke altında olğan halqlarğa, hususan Yaqın Şarq bölgesine tınçlıq tiledi, em de Ukrayinağa yardım köstergen memleketlerge teşekkür bildirdi.
“Biz Yaqın Şarqta ve Körfez bölgesinde olğan şeylerni köremiz. İrandaki rejim ğalebe qazanmaycağına ümüt etemiz, çünki bu insaniyetke qarşı rejimdir – o bütün regionğa cenk yaymaqta. Biz epimiz bir yamanlıqqa qarşı turamız – yaşayışlarnı yoq etkenlerge, insanlarğa sayğısızlıq köstergenlerge qarşı. Moskvada ve İrandaki rejim o qadar yaqın olğanı tesaddüf degil. Olarnı insanlarğa qarşı köstergenleri sayğısızlıq birleştire. Biz epimiz Avropada, dünyada, böyle rejimlerden qorçalavda semereli olmaq kerekmiz. Semereli olmalımız, yaşayış qazansın.”
Bundan ğayrı, qırımtatar halqınıñ lideri Mustafa Cemilev de çıqışta bulundı.
“Bizim vatandaşlarımıznıñ çoqusı – 90%-ğa yaqın, başqa tahminlerge köre ise – tamır halqlarnıñ tahminen 95-96%, Rusiyeniñ teşviqatına baqmadan, öz vatanına sadıq qalalar ve Ukrayina Silâlı Quvetleriniñ muvafaqiyetli olması içün dua eteler”.
Bundan da ğayrı, tedbir vaqtında Ukrayina Prezidenti doğrudan cenkte iştirak etip, ukrayin topraqlarını azat etmek içün küreşken ukrayin qorçalayıcılarına devlet mukâfatlarını taqdim etti.
Açılış sözlerinden soñ Ukrayina Prezidentine Qırımdan kelgen, şimdi de orduda hizmet köstergen, bazıları ise esirlikten azat etilgen, hususan Ruslan Kurmallayev kibi arbiyler aqqında ikâyelerge esaslanğan sergi taqdim etildi. Sergideki numayış etilgen ikâyeler arasında “Ştorm“ lağaplı Alimeniñ de ikâyesi yer almaqta. O, Qırımnıñ Canköy rayonında doğdı ve şimdi Ukrayina milliy gvardiyasında hızmet etmekte.
