Ukrayina prezidenti Volodımır Zelenskıy 2026 senesi aprelniñ 1-nde imzalanğan №289/2026 fermanınen qırımtatar halqınıñ vekillerini devlet nişanlarınen mukâfatlandırdı.
Olarnıñ arasında – cemaat erbapları, ocalar, sportçılar, jurnalistler ve Milliy Meclisniñ vekili yer almaqta.
Hususan, Prezident fermanı ile mukâfatlandırılğanlar:
- İlmi Umerov, Milliy Meclis reisiniñ muavini – “Yararlıqlar içün” I derece nişanı;
- Akim Galimov, prodüsser, vesiqalı-tarihiy leyhalarnıñ müellifi, – “Yararlıqlar içün” II derece nişanı;
- Mustafa Ametov, “Qırımtatar tiliniñ inkişafı institutı” cemaat birleşmesiniñ reisi, – “Yararlıqlar içün” III derece nişanı;
- Arsen Jumadilov, Ukrayina Mudafaa nazirliginiñ “Mudafaa saasında satın aluvlar agentligi” Devlet müessisesiniñ müdiri, – “Yararlıqlar içün” III derece nişanı;
- Suleyman Bekir Ogli Mamutov, Ukrayina tamır halqları meseleleri boyunca BMT Daimiy forumınıñ ekspert azası ve maruzacısı, uquq qoruyıcı, – “Yararlıqlar içün” III derece nişanı;
- Ayder Rustemov, Qırım musulmanları diniy idaresiniñ yolbaşçısı, – “Yararlıqlar içün” III derece nişanı;
- İrfan Mirzoyev, Ukrayina yunan küreşi milliy taqımınıñ sportçu-talimatlandırıcı, “Yararlıqlar içün” III derece nişanı;
- Nariman Suleymanov, Qırım Muhtar Cumhuriyeti ve Aqyar şeeriniñ prokuraturasınıñ başı, – “Yararlıqlar içün” III derece nişanı;
- Lenur Temirov, Ukrayina yunan küreşi milliy taqımınıñ baş idmancısı, – “Yararlıqlar içün” III derece nişanı;
- Leniye Umerova, cemaat faali, “Yararlıqlar içün” III derece nişanı;
- Emine Emirsaliyeva, teşebbüsçi, göñülli, – III derece “Knâğınâ Olga” III derece nişanı;
- Cemil Karikov, bestekâr, kontsertmeyster, “Ukrayina halq artisti” unvanı;
- Rustem Skibin, ressam-çölmekçi, dizayncı, “Ukrayina halq ressamı” unvanı;
- Gülnaz Acigeldiyeva ve Afize Emiramzayeva, “Birlik School” Qırımtatar litseyin şahsiy müessisesiniñ ocaları, – “Ukrayinanıñ nam qazanğan ocası” unvanları;
- Naciye Ametova, “QIRIM.Media” online neşiriniñ baş muarriri, – “Ukrayinanıñ nam qazanğan jurnalisti” unvanı;
- Sabriye Slatön, Taras Şevçenko adına Kıyiv milliy universitetiniñ tasil-ilmiy filologiya institutı kafedrasınıñ ocası – “Ukrainanıñ nam qazanğan tasil hadimi” unvanını aldı.
Açılış sözünde Volodımır Zelenskıy, Rusiye tam miqyaslı cenkke yavaş-yavaş azırlanğanını ve onıñ ilk adımı Qırımnıñ işğal etilüvi olğanını qayd etti. Amma prezidentniñ aytqanına köre, o vaqıt dünyanıñ işğalge qarşı areketleri yeterli degil edi. Şimdi Ukrayina cenkni adaletli şekilde barışıqnen bitirip, bütün topraqlarını qaytarmaq içün küçlü kefaletlerge muhtac.
“Şimdi biz, istilâcı başlatqan cenki içün bir de bir mükâfat almaması içün, mümkün olğanı qadar printsipial şekilde küreşemiz. Rusiyeniñ bizge, bizim Qırımımızğa ve bütün Ukrayinağa qarşı istilâsı içün kerçekten de mesüliyetke çekilmesi içün. Bu cenkni Ukrayina içün lâyıq bir barışıqnen bitirecekmiz. Yañı rus tecavuzı olmasın, rus raketaları ve işğalcileri olmasın, rus tecavuzından qorçalanuv tedbirleri yeterli olsun”, – dep qayd etti Prezident.
Ukrayina Prezidenti ayrıca Ükümet tarafından Qırımtatar Milliy Meclisine qırımtatar halqınıñ temsiliy organınıñ uquqiy statusını berüv meselesiniñ çezilüvine dair aprelniñ 2-nde qabul etilgen №293/2026 Fermanı aqqında da söz yürsetti.
Qırımtatar Milliy Meclisiniñ reisi Refat Çubarov da kiriş sözüninen çıqışta bulunda.
“Qırımtatar halqınıñ temsilcileriniñ mukâfatlanuvını ayrıca qayd etmek isteyim. Bu olarnıñ ihtisaslığı, printsipialligi ve öz halqınıñ aqları ile Ukrayina içün küreşten vazgeçmeme meselesidir. Bu devletniñ öz vatandaşlarını körgenini, qıymetlendirgenini ve desteklegenini de köstere”.
