Ukrayina prezidenti Volodımır Zelenskıy beşinci Qırım platforması sammitiniñ açılışında çıqışta bulunıp, Qırımnıñ rus işğali teşkil etken global telükeni, em halqara toplulıqnıñ tecavuzğa cevap bermemesi sebebinden meydanğa kelgen diger telükelerni qayd etti. Onıñ qayd etkenine köre, yarımadanıñ işğali diger istilâcılarğa devlet suverenitetiniñ bozulması pek qolay olğanını köstergen bir örnek ola bile.

“Qırım – bu yalıñız bir topraq parçası degil. Millionlarnen ukrainler içün ve hususan Qırım sakinleri içün – bu ev, kimlik ve yaşayış tarzı. Rusiye içün ise topraqlarnı zapt etüv alışqanlıq oldı ve oña iç toymay. Qırım ne olğanını unutmamaq ve Rusiyeniñ mesüliyetke çekilmesini temin etmek kerekmiz. Biz unutmaycaqmız. Afu etmeycekmiz”, – dep qayd etti Ukrayina Prezidenti Volodımır Zelenskıy.

Ukrayina prezidenti Volodımır Zelenskıy Rusiye tecavuzınıñ normalleşmesine yol berilmemesi esas maqsatlardan biri olğanını qayd etip, insanlıqnıñ qanunsız işğalniñ norma sayılacaq bir dünya tertibiniñ qurulmamasına yol bermemesi kerekligini da qoştı.

Bu sene Qırım platformasınıñ sammiti Birleşken Milletler Teşkilâtınıñ 80 yıllığı munasebetinen Birleşken Milletler Teşkilâtınıñ Baş Assambleyası çerçivesinde Nyu Yorkta keçirile.