İlk yaz ayınıñ 16-da Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç ‘Qırım evi” tarafından qırımlı siyasiy mabuslarğa qol tutuv olaraq teşkil etilgen tedbirde iştirak etti, tedbirniñ esas maqsadı Rusiyede ve Qırımda siyasiy sebeplerden taqip etilgen ve maküm etilgen Ukraina vatandaşları aqqında hatırlatmaq ve olarnıñ azat etilmesini talap etmektir.

Rusiye Federatsiyası ve vaqtınca işğal etilgen Qırım MC ve Aqyar şeeri topraqlarında oña boysunğan işğalci memuriyet siyasiy sebeplerden 100 yaqın Ukraina vatandaşını azatlıqtan marum etti. Siyasiy cezalavlarğa ekseriy allarda cemaat faalleri ve grajdan jurnalistler oğray.

”Temsilcilik içün siyasiy mabuslarnı qorçalav meselesi daima ilk nevbetteki vazifelerimizden biridir. Fikirimce, Ukrainada siyasiy mabuslarnı uquqiy ve içtimaiy ceetten qorçalağan bir qanun qabul etilmeli. Aynı vaqıtta, al-azırda siyasiy mabuslarğa ve olarnıñ qorantalarına maddiy yardımda bulunğan İdarelerarası komissiya çalışmaqta, Daimiy Temsilciniñ muavini Tamila Taşeva bu komissiyanıñ azalarından biridir. Azat etilgen qırımlı siyasiy mabuslarnı, siyasiy mabuslarnıñ qoranta azalarını komissiyağa öz vesiqalarını taqdim etmege çağıramız. Siyasiy mabuslarnı qorçalağan, bütün dünyağa olar aqqında haber etken teşebbüsçi cemaatçılarğa ve cemaat teşkilâtlarına, aq qorçalayıcılarğa ve grajdan jurnalistlerine de minnetdarlığımıznı bildiremiz. Siyasiy mabuslar ve olarnıñ qoranta azaları içün büyük işler yapqan ”Qırım birdemligi” ve ”Qırım balalığı” cemaat birliklerine ayrıca minnetdarmız” – dep qayd etti öz çıqışında Anton Korınevıç.

Temsilcilik  qırımlı siyasiy mabuslarğa ve olarnıñ qoranta azalarına qol tutmaq içün qolundan kelgenini yapmaqtadır.