Kiçik aynıñ 27-de Qırım evinde Qırım Muhtar Cumhuriyetiniñ ve Aqyar şeeriniñ işğal etilüvine qarşılıq kösterüv Künü munasebetinen “Qırım işğaline tışarıdan bir baqış” mevzusında halq ögündeki munaqaşa keçirildi.

Munaqaşa esnasında 2014 senesinden başlap, 2021 senesinece Qırım işğali mevzusında halqara seviyede aydınlatuv nasıl etip deñişkeni muzakere etildi.

Ukraina Prezidentiniñ Qırım MC-deki Daimiy Temsilcisiniñ Birinci muavini Darya Svırıdovanıñ qayd etkenine köre, ”Temsilcilik Rusiye Federatsiyası tarafından vaqtınca işğal etilgen Qırımda insan aqlarınıñ bozulması, arbileştirüv ve ekologik vaziyetke dair malümatlarnı toplamaq içün ğayretlerini sarf ete.
Müim vazifemiz, Qırımnıñ işğalden azat etilüvine qol tutuv oğunda halqara ğayretlerni birleştirüv ve, elbette, bütün içki küçlerimizni birleştirüvdir”.

Munaqaşa iştirakçileri:

• Ukraina Prezidentiniñ Qırım MC-deki Daimiy Temsilcisiniñ Birinci muavini Darya Svırıdova;
  
• Qırımtatar Milliy Meclisiniñ reisi Refat Çubarov;
  
• Lehistanlı jurnalist, «Gazeta Wyborcza» ve «Outriders» mabuat vastalarınıñ muhbiri Petr Andrüşeçko;
  
• Yönetici – jurnalist, ”Ğratı” matbuat vastasınıñ baş muarriri Anton Naumlük.

Bundan ğayrı, tedbir çerçivesinde açılğan

”7 yıllıq qarşılıq kösterüv” sergisi ”Qırım.Aqiqat” leyhasınıñ baş muarriri Volodımır Prıtula ve jurnalist Stanislav Yurçenko tarafından 2014 senesiniñ kiçik ayı – saban ayı devamında Rusiye askerleri yarımadanı zapt etken vaqıtta çıqarılıp, Qırım MC Yuqarı Şurası yanında Qırımtatar Milliy Meclisi tarafından teşkil etilgen miting, cenkke qarşı çıqqan qadınlar, memuriy binalarnı, arbiy bölüklerni, ava limanını zapt etüv ve başqa adiselerni aks etken foto ve video leyhalarını birleştire. Bu vesiqalar yarımadadaki Ukraina tarafdarları işğalcilerge nasıl etip qarşılıq köstergenini hatırlata.

Serginiñ açılışında Ukraina Prezidentiniñ Qırım MC-deki Daimiy Temsilcisi Anton Korınevıç böyle tedbirlerniñ keçirilmesi pek müim olğanını, işbu sergi 2014 senesi ve şimdi Qırımda alınıp barılğan küreşni köstergenini qayd etti.

Bundan ğayrı o, Ukraina Prezidenti ”Vaqtınca işğal etilgen Qırım Muhtar Cumhuriyeti ve Aqyar şeeri topraqlarınıñ işğalden azat etilüvi ile ğayrıdan integrasiya etilüvini maqsat etip qoyğan ayrı tedbirler aqqında” 78/2021 sanlı müim fermannı imzalağanını hatırlattı.

”Bizni Qırım yarımadasınıñ işğalden azat etilüvini kün-künden yaqınlaştırğan pek çoq müim işler bekley.
Qırımnı Ukrainanıñ nezareti altına qaytarmaq içün qolumızdan kelgenini yapacaqmız”.

Qırım evinde ”7 yıllıq qarşılıq kösterüv” mevzusında açılğan sergi kiçik aynıñ 28-den başlap, saban ayınıñ 13-nece saat 11:00-den 18:00-gece er kün çalışacaq. Sizni sergini ziyaret etmege davet etemiz, kirişi serbest!

Adres: Kıyiv şeeri, Omelânovıç-Pavlenko soqağı, 9-ncı bina.