2018 senesi (fevral) kiçik aynıñ 25 künü Daimiy Temsilciniñ Birinci muavini İzet Gdanov ‘’ATR’’ televizion kanalında ‘‘Qırım işğaliniñ 4-nci yıldönümi’’ mevzusında olıp keçken ‘‘KÖPÜR’’ TV yayınında iştirak etti. Tedbirde Qırımtatar halqınıñ meseleleri boyunca Ukrayna Prezidentiniñ yardımcısı Mustafa Cemilev, Qırımtatar halqı Milliy Meclis reisi ve reisniñ muavinleri, yani Refat Çubarov, İlmi Umerov, Ahtem Çiygoz, Eskender Bariyev; sabıq Ukraina halq deputatı Andriy Sençenko, Ukraina halq deputatları Yuriy Mamçur, Yuriy Miroşniçenko, İgor Lapin, Ukraina Havfsızlıq Hızmetiniñ sabıq reis muavini Viktor Yagun, siyasetşınas Lenora Dülber, antiterroristik ameliyatında iştirak etken qırımlı askerler ve cemaat faalcileri iştirak etti. Yayınnıñ çerçivesinde Qırım 4 yıl evelsi ğayıp etilgeniniñ sebepleri ve işğal olunğan yarımadada olıp keçken deñişmeler coşqunlıqnen muzakere etildi.

Qırımnıñ işgalden azat etilüvine dair akimiyetniñ ve cemiyetniñ areketleri ve areketsizligi aqqında munaqaşa ötkerildi. Birinci muavin, yarımadanıñ işğaline öz azırlığını Rusiye 2014 senesi (fevral) kiçik ayınıñ 20 kününden bayağı evel başlağanını qayd etti. Al-azırda işğalci tarafından qaba şekilde halqara gumanitar uquq bozulmaqta. İşğalden azat etilüvini ve ğayrıdan integratsiya ceryanını tezleştirmek içün bütün devlet akimiyeti organları, halq deputatları ve cemiyet tışqı duşman ile küreş oğrunda öz ğayretlerini birleştirmeliler.

Temsilcilik Ukrainanıñ vaqtınca işğal etilgen Qırım toprağından rusiye işğaliniñ devam etmesine qarşılıq kösterüv, Qırımda Ukraina devletiniñ, uquqiy şahıslarnıñ ve vatandaşlarınıñ menfaatlarınıñ qorçalanması boyunca acele plan ve Qırımnıñ işgalden azat etilüviden soñ amelge keçirilecek tedbirlerniñ kompleksini teşkil etken Qırımnıñ ğayrıdan integratsiya boyunca strategiya üstünde çalışa.