7 yıl evelsi, 2014 senesi saban ayınıñ 3-de, qırımtatar faali Reşat Ametov, Qırım yarımadasınıñ işğal etilmesine qarşı narazlığını bildirip, Aqmescit şeeriniñ merkeziy meydanına çıqtı. Rusiye arbiyleriniñ imayesinde bulunğan sözde Qırım ”samooboronası” tarafından yaqalanğanı işbu video leyhada aks etilgen:
https://www.youtube.com/watch?v=11S2Vhkr-bc
Qaçırılğan soñ areketleri aqqında iç bir türlü teşkerilgen ve tasdıqlanğan malümatlar bu küngece bildirilmedi. Mobil operatorlar bergen malümatqa köre, qaçırılğan soñ Reşat Ametov deral Aqmescit şeerindeki Karl Libkhnet (Dolgorukovska) soqağındaki ”Rus birdemliginiñ” ofisine ketirilgen edi. O vaqıtta anda Qırım ”samooboronasınıñ” ştablarından biri yerleşe edi. İşbu yerde onıñ telefonı soñki kere çalıştırılğan edi.
Vahşiyce qıynalıp öldürilgen Reşat Ametovnıñ cesedi Qırımdaki Qarasuvbazar rayonınıñ Ortalan (Zemlâniçne) köyünde tapılğan edi.
Reşat Ametovnıñ öldürilüvi, Ukrainadaki vaziyetke dair evelden taqip etüv çerçivesinde Halqara ceza mahkemesiniñ prokurorı tarafından baqıla bilecek vaqialardan biridir. Daa soñra oña enqastan öldüriv şekilinde insaniyetke qarşı cinayet ya da arbiy cinayet olaraq qıymet kesile bilir.
Al-azırda ukrain uquq qorçalav organları faalniñ öldürilmesine ayni böyle şekilde qıymet kesip, onı Qırımda işlengen arbiy cinayetlerniñ bir parçası olaraq qabul eteler.
Reşatnıñ soñki areketleri tesaduf degil edi. İç olmadım Facebooktaki dostlarınıñ onıñ aqqında haberleri bar edi. Meydanğa narazlıq ile çıqacağını bir qaç kün evelsi, yani kiçik aynıñ 28-de, içtimaiy ağlarda haber etken edi.
Ukraina Prezidentiniñ Qırım MC-deki Temsilciligi işğalniñ er bir qurbanını hatırlay ve bugün Reşat Ametovnıñ qoranta azalarına ve yaqınlarına qol tutuv sözlerini bildire. Ukrain uquq qorçalav organları ile beraber er bir cinayetçiniñ cezalanması içün qolumızdan kelgenini yapamız.