2018 senesi çiçek ayı (aprel) 25 künü Ukraina Prezidentiniñ Qırım MC Temsilciliginiñ hadimleri Ukraina Milliy politsiyası Devriye politsiya departamentiniñ Qırım MC ve Aqyar şeerinde devriye politsiyası bölügine işke aluvnıñ taqdiminde iştirak ettiler. Taqdim Kıyiv şeerinde Ukraina Milliy politsiyasınıñ yolbaşçısı Sergiy Knyazev, Ukraina Milliy Politsiyasınıñ Qırım MC ve Aqyar şeerinde Baş idaresiniñ reisi Anatoliy Bahçivancı ve Devriye politsiya departamentiniñ yolbaşçısı Yevgeniy Jukov iştiragi ile keçti.

Taqdim esnasında kelecekteki bölükniñ miqdarı, vekâletleri ve maddiy-tehnikiy teminlevi aqqında haber etildi. Qırım Muhtar Cumhuriyetinde ve Aqyar şeerinde devriye politsiya bölügi sıñır çizgisine yaqın olğan rayonlarda 2018 senesi quralay (mayıs) 14 künü hızmetini başlaycaqtır. Temsilcilik yuqarıda qayd etilgen teşebbüske tolusınen qol tuta ve vekâleti çerçivesinde Ukraina Milliy politsiyasınıñ bölüklerine Ukrainanıñ vaqtınca işğal etilgen Qırım topraqlarınen bağlı vazifelerini becermege yardım etecektir. Şübesiz ki, işbu bölükniñ teşkil etilüvi işğal etilgen topraqlarda ve sıñır çizgisiniñ yanında teşkil olunğan ve işğalci devlet tarafından, başqa vastalarnen beraber, Ukrainanıñ nezareti altında bulunğan topraqlarda vaziyetni kerginleştirmek içün qullanılğan cinayetçilikke qarşılıq kösterüv, Qırım sakinleriniñ aq-uquqlarına riayet etüv boyunca Milliy politsiyanıñ semereli faaliyetine hızmet etecektir.