Saban ayınıñ 23-de Qırım MC ve Aqyar şeeri Prokuraturası Temsilcilikniñ muracaatına binaen arbiy kerekligi olmasa da, şahsiy ve devlet mülkiyetiniñ zapt etilüvini maqsad etip qoyğan, qanunsız ve sebepsiz şekilde ”Foros landşaft parkı” bahça-park abidesini kütleviy şekilde bozmağa başlağan, böyleliknen işğalci devletniñ siyasetini amelge keçirgen işğalci akimiyetniñ vekilleri aqqındaki malümatlarnı Yekâne mahkemeden evelki taqiqatlar cedveline kirsetti. İşğalci memuriyetniñ işbu areketlerine cenk qanunlarını ve adetlerini bozuv (Ukraina ceza codeksiniñ 438 maddesi) olaraq qıymet kesildi. Taqiqatnı Milliy polisniñ Qırım MC ve Aqyar şeeri boyunca Baş idaresi alıp barmaqtadır.

”Vaqtınca işğal etilgen Qırımda Rusiye Federatsiyasınıñ işğalci memuriyeti kerçekleştirgen ekologik сinayetni takbih etemiz. Sözde ”Keriç boğazınıñ”, sözde ”Tavrida” yolunıñ qurulması, tabiat-qoruq yerlerinde arbiy talimatlarnı keçirüv, Meganom burnında qurucılıq ceryanınıñ başlatılması – bu areketlerniñ episi Qırım yarımadası topraqlarına, Qara ve Azaq deñizleriniñ suvlarına menfiy tesir etmektedir. Tabiat abidesi ve devlet seviyesinde qorçalanğan qadimiy Foros parkında qurucılıq ceryanını başlatqan işğalci memuriyet nevbetteki ciddiy cinayetini işledi, böyle areketler yarımadanıñ tabiatına ve etraf müitine soñ derece menfiy tesir ete. Bu qanunsız faaliyet aqqında mütenasip malümatlarnı uquq qorçalav organlarına taqdim ettik, muracaatımızğa binaen mütenasip kriminal dava açıldı. Uquq qorçalav organlarına muracaatımızğa qıymet keskenleri içün minnetdarlığımıznı bildiremiz, eminmiz ki, işğalci memuriyetniñ bu kibi areketleri em ukrain uquq qorçalav organlarnıñ, em halqara cemiyetniñ diqqatını celp etmeli”, – dep izaatlay Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç.

Vaqtınca işğal etilgen Qırım Muhtar Cumhuriyeti ve Aqyar şeeri topraqlarında yaşağan Ukraina vatandaşlarınıñ aq-uquqlarını ve qanuniy menfaatlarını, Ukrainanıñ tarihiy ve medeniy mirasını qorçalağan ve başqa meselelernen oğraşqan Temsilcilik muntazam sürette işğalci devlet Rusiye Federatsiyasınıñ ve onı temsil etken işğalci memuriyetniñ qanunsız areketlerini taqip etmekte. Er bir yañı adisege mütenasip uquqiy qıymet kesilecek.

Vaqtınca işğal etilgen Qırım Muhtar Cumhuriyeti ve Aqyar şeeri topraqlarındaki tabiat-qoruq yerlerinde qanunsız qurucılıq ceryanları aqqında Temsilcilik tarafından azırlanğan malümat kâğıdında oqumaq mümkün: https://cutt.ly/TxRWTxY

Foros parkınıñ fotoresimi cemaatqa açıq menbalardan alındı