2014 senesi saban ayınıñ 15-de Reşat Ametovnıñ ölüsi tapılğan edi.
Saban ayınıñ 3-de o, Qırım Muhtar Cumhuriyetiniñ işğal etilüvine qarşılıq kösterip, bir kişilik piketke çıqtı, bundan ğayrı, arbiy komisarlıqta göñülli olaraq yazılacaq edi. Bucudında çoqtan-çoq qıynavlarnıñ izleri qaldı, başı skotç ile sarılı, yanında buğav yata edi. Reşatnıñ ömür arqadaşı ve üç balası bar edi.
Reşat Ametovğa ölüminden soñ Ukraina Qaramanı unvanı berildi.
Ukraina uquq qorçalav organlarınıñ malümatlarına köre, faalni Rusiye Federatsiyası Silâlı quvetleriniñ sabıq arbiysiniñ reberiyetindeki sözde Qırım ”samooboronası” adında qanunsız silâlı teşkilâtınıñ eki azası hırsızlağan edi. Ametovnı öldürilüvine dair cinaiy davanıñ tedqiq etilmesi al-azırda devam etmekte.
”Reşat Ametovnıñ hırsızlanmasına dair davanı keçken sene al ettik, onı hırsızlağan üç şahısnıñ adlarını belgiledik. İşbu şahıslarğa qabaatlavlar bildirildi, olar milliy seviyede qıdırılmağa başladı, olarnı halqara seviyede qıdıruvğa da ilân etmege tırıştıq”, – dep bildirdi ”Qırım MC ve Aqyar şeeriniñ işğal etilüvine qarşılıq kösterüv künü” adlı televizion marafonı esnasında Qırım Muhtar Cumhuriyeti ve Aqyar şeeri Prokuraturasınıñ reberi İgor Ponoçovnıy.
📢 Aynı şu künü Rusiye arbiyleri ”Kerç” radiotelevizion berici stantsiyasını öz nezareti altına keçirdiler.
Herson vilâyeti Geniçesk rayonınıñ Arabat belinde ukrain arbiyleriniñ arqasında arbiy vertolötlardan rusiye ordusınıñ desantı oturdı.
📢 Bundan ğayrı, Ukraina sıñır hızmetiniñ Masandra ve Gurzuftaki obyektleri zapt etilip, şu yerde Rusiye Federatsiyası silâlı quvetleriniñ zenit-raketa divizionı yerleştirildi.