Ekim ayınıñ 6-7 künleri Qırım Platforması Ofisiniñ bir sira ecnebiy eyyetler ile halqara teşkilâtlarğa taqdim etilüvi çerçivesinde Ukraina Prezidentiniñ Qırım MC-deki Temsicliliginiñ reberiyeti diplomatlarğa aq qorçalayıcı, ”Qırım birdemligi” birleşmesiniñ faali Mumine Saliyevanıñ ”Apis etilüvden soñ doğğanlar” fotoleyhasını numayış ettiler. Leyha, qanunsız alda apis etilgen Qırım sakinleriniñ balalarına, babalarınıñ apis etilüvinden soñ dünyağa kelgen qızçıq ve oğlançıqlarğa bağışlanğandır.
İlk-evelâ fotoleyha onlayn şekilde bu yılnıñ başında meydanğa ketirilgen edi: https://www.bornafterarrest.net.Amma Qırım Platformasınıñ başlatılması oflayn serginiñ teşkil etilmesi içün imkânlar yarattı.
Fotoleyha umumen alğanda 12 bala fotosüretinden ibarettir. Bu qorantalardaki erkekler işğal etilgen Qırımda siyasiy sebeplerge esaslanğan cinaiy taqip etüvler neticesinde apis etildi, olardan bazıları endi Rusiye Federatsiyasındaki apishanelerge avuştırıldı. Er bir resim yanında qorantanıñ bu dramatik vaqialardan soñ yaşayışı tarif etile.
Leyhanıñ maqsadı, Qırımda siyasiy taqip etüvler meselesine ve bu taqip etüvlerden zarar körgen insanlarnıñ taqdirlerine ukrain ve halqara cemiyetleriniñ diqqatlarını celp etmektir. ”Qırım birdemligi” leyhasınıñ malümatlarına köre, al-azırda Qırımda siyasiy taqip etüvler neticesinde babasız terbiyelengen 197 bala bar.
”Qırım birdemligi” birleşmesiniñ faali ve ”Qırım balalığı” leyhasınıñ yöneticisi Mumine Saliyeva da dört balasını qocasız östüre, onıñ ömür arqadaşı grajdanlıq jurnalisti Seyran Saliyev dört buçuq yıl evelsi, 2017 senesiniñ qara qış ayında yaqalandı ve bundan soñ 16 yıllıq müddetke maküm etildi. Soñki yıllar devamında Mumine hanım mecburen jurnalistik faaliyetinen oğraşa, Qırımda cezalavlarnen bağlı adiselerni aydınlata, şu cümleden, çoq resim çıqara.
”Apis etilüvden soñ doğğanlar” fotoleyhası Mumineniñ balalarğa yardım etüvni maqsat etip qoyğan faaliyetini ve fotoresimlerni çıqaruvğa avesligini birleştire. 2020 senesiniñ soñunda – 2021 senesiniñ başında faal qadın bütün qorantalarnı ziyaret etip, babalarınıñ apis etilüvinden soñ doğğan balalarnıñ resimlerini çıqardı. Olar işbu fotoleyhağa temel qoydılar.
Bu yıl Ukraina Prezidenti Mumine Saliyevanı ”Knâginâ Olga” ІІІ derece ordeni ile mükâfatlandırdı.
Yaqınlarda o, qıtada aliy jurnalistik tasilini aldı, Ukraina jurnalistler Milliy Birliginiñ azası oldı. 2020 senesi Mumine qanunsız şekilde tutulğan şahıslarnıñ balaları aqqındaki filmi (http://project3389972.tilda.ws) içün Andre Lorş jurnalistik mükafatını aldı.
Ekim ayınıñ 6-8 künleri devamında Qırım Platforması ofisinde çoqtan-çoq diplomatik missiyalarnıñ ve halqara teşkilâtlarnıñ vekilleri, şu cümleden, BM İnsan aqları boyunca nezaret etici missiyası, Mustaqil Malta Ordeni, Litvaniya, Letoniya, Estoniya, Finlandiya, Avstriya, Çehiya, Slovakiya, Sloveniya, Lehistan, Horvatiya, Macaristan, İtaliya, İspaniya elçihaneleri ve al-azırda Ukrainada resmiy ziyaretler ile bulunğan Letoniya Cumhuriyeti Saemniñ vitse-spikeri Dagmara Beytnere-Le Galla ve İsviçre çetel işler Nazirliginiñ insan aqları boyunca Komissarı işbu sergini köre bilir.
Bundan ğayrı, sergi Temsilcilik tarafından teşkil etilgen başqa körüşüvlerde – ukrain grajdanlıq cemiyeti, içtimaiy mesüliyet saipleri olğan iş adamları, devlet sektorı ve Ukrain siyasiy studiyalar mektebiniñ mezunları ağına kirgen media mensüplarına numayış etilecektir.
Serginiñ teşkil etilmesinde İnsan aqları oğrundaki media teşebbüsi, İnsan aqları boyunca Ukraina-Helsinki birligi ve ”İnsan aqları amelde” USAID Leyhası iştirak ettiler.