2018 senesi saban ayınıñ (mart) 12 künü Ukraina Prezidentiniñ Qırım MC Daimiy Temsilcisi vaqtınca işğal etilgen Qırım MC topraqlarında yaşağan vatandaşlarınıñ tasil aqlarına riayet etmek maqsadınen devlet aliy oquv yurtlarınıñ temsilcileri, ‘‘Qırım-Ukraina’’ oquv merkezleriniñ yolbaşcıları ile keñeş keçirdi. Toplaşuvda Ukraina haber siyaseti Naziriniñ mesleatçısı, Ukraina tasil ve ilim nazirliginiñ Aliy tasil departament bölüginiñ müdiri, Herson vilâyeti devlet memuriyetindeki Tasil ve ilim departamentiniñ müdiri, O.V. Mişukov adına Herson akademik litseyiniñ müdiri iştirak ettiler. Tedbirge Herson şeer şurasındaki Tasil idaresiniñ ve Gençler ve etişkenler içün şeer tasil merkeziniñ temsilcileri de qoşuldı.

Muşavere devamında 2017 senesi aliy oquv yurtlarına kirişniñ neticelerine yekün çekildi, 2018 senesi kiriş kampaniyağa azırlıqnıñ vaziyeti, vaqtınca işğal etilgen Qırım MC topraqlarında yaşağan Ukraina vatandaşlarnıñ tasil aqlarına riayet etilüvinen bağlı meseleler ve olarnı çezüv yolları, 2018 senesine ayırılğan kvotalar, uzaqtan ve eksternat şekilinde tasil imkânları muzakere etildi.

Muşavere iştirakçileri oquv yurtlarnıñ ve icra akimiyet organlarınıñ bu seneniñ kiriş kampaniyası devamında faaliyetlerini ve işbirliklerini mükemmeleştirüvi, oquv ceryanınıñ içtimaiy ve maddiy-tehnikiy ceetten temin etilüvi boyunca tavsiyeler azırladılar.

Ukraina Prezidentiniñ Qırım MC Daimiy Temsilcisi Borıs Babin Qırımdan memleket içinde mecburen köçken şahıslarnıñ tasil aqlarına riayet etüvnen, bu cimleden, aliy oquv yurtlarına kirişnen bağli problemalarnı seslendirdi.