Kursnıñ müellifleri arasında Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korıneviç, jurnalist ve aq qorçalayıcı Alim Aliyev, Ukraina çetel işler Naziriniñ birinci muavini Emine Caparova, Ukraina Yuqarı şurası deputatı, Qırımtatar halqınıñ lideri Mustafa Cemilev, aktör ve rejissör Ahtem Seyitablayev, kinorejissör Oleg Sentsov, Taras Şevçenko adına Kıyiv Milliy Universitetiniñ rektorı Volodımır Bugrov bardır.
Tasil aluv ve Qırım adlı ukrain yarımadası aqqında yañı bilgilerni elde etüv vaqtınca işğal etilgen topraqlarnı ğayrıdan integratsiya etüv ceryanınıñ müim bir parçasıdır. İşte ”Qırım – bizlermiz” onlayn-kursı bunı maqsat etip qoyğandır.
Tasil ceryanı qırım tatar halqınıñ medeniyet ve Qırımnıñ peyda oluvı ve inkişaf etmesiniñ milliy-diniy kimligi, deñiştirilmegen tarihı, geopolitik, tarihiy, iqtisadiy ve başqa ceetlerine bağışlanğandır.
Kursta uzaqtan oqumağa mümkün, neticede diñleyiciler aşağıdaki bilgilerni elde ete bilir:
– tarihiy kerçeklerni ve geopolitik şaraitlerni diqqatqa alıp, Qırım ve qırımtatarlar aqqındaki bilgilerini bayağı keñişletir;
– Qırım yarımadası sakinleriniñ ayat ikâyelerinen tanış olur;
– qırımtatarlarnen serbest laf ete bilmek içün qırımtatar tilinde keñiş darqalqan ibarelerni diñlep, ezberlerler.
Lektsiyalar dört modulden ibaret. Misal olaraq, ”saa” moduli – Qırım studiyalarına til, coğrafiya, iqtisadiyat, tarih, medeniy kimlik ve hatırlavlar vastasınen kiriş. ”Medeniyet” moduli ayat tarzı, medeniy hususiyetler ve uquq kibi meselelerge bağışlanğandır. “Mifler” bölügi din, iqtisadiyat ve tarihnen bağlı yañlış fikirlerni çetke alıp taşlay. ”Strategiya” bölüginde Ukraina tarafından Qırımnıñ ğayrıdan integratsiya etilmesi içün neler yapılğanını bilmek mümkün. Oquv ceryanı 4 afda devam etecek, er afta birer saat video şeklinde lektsiyalar numayış etilecektir.
”Ukraina haritasına baqqan gençlerimiz Qırım Muhtar Cumhuriyeti, Aqyar şeeriniñ Ukraina topraqları olğanını añlamaq kerekler. Ebet, olar vaqtınca işğal etildi, amma bu haritada işaretlenmeleri nafile degil, bunı bütün medeniy dünya, bütün halqara cemiyet añlamaqtadır”, – dep izaatladı Korınevıç.
”Qırım – bizlermiz” bedava onlayn-kursına aşağıdaki bağlantı boyunca yazılmağa mümkün: https://cutt.ly/ZENy7HV.
Kursnıñ qısqa videosı: https://www.youtube.com/watch?v=HQUUvnYuuBI