2018 senesi saban ayınıñ (mart) 14 künü AQŞ Devlet departamentiniñ sözcüsi Gezer Nauert işğal etilgen Qırımda sözde ‘‘referendum’’ boyunca resmiy bidirüv yaptı:

‘‘4 yıl evelsi aynı bu künlerde Ukrainağa ait olğan topraqlarnı ilhaq etmek maqsadınen Rusiye qanunsız ve sahte ‘‘referendumnı’’ keçirdi. Qırım sakinleri, ağır silâlı Rusiye ordusınıñ nezareti altında rey bermek mecbur ediler. Rusiyeniñ, Ukraina sakinleri bu sahte «referendumda» serbest saylav yaptılar, degenine er vaqıt kerçekke beñzerlik yetmey edi.

Prezident Putin, özüniñ Qırımdaki saylav aldı mitinginde Rusiyeniñ Ukraina territoriyasına yalancı iddialarını tekrarlap, Rusiye ukümetiniñ halqara nizamğa emiyet bermegenini ve mustaqil devletlerniñ topraq bütünligini ürmet etmegenini daa bir kere açıqtan numayış etti.

Putinnıñ izaatlarını diqqatqa alıp, yapma ‘‘referendumnıñ’’ qanunsız olğanına ve Qırım sakinleri Rusiye ükümetiniñ qabaatından sebep yüksek fiyat tölegenine diqqat çekmek müimdir. Soñki dört yıl devamında Rusiye ilhaqnen razı olmağanlarğa qarşı zorbalıq ve zorlav kampaniyasını alıp barmaqta. Rusiye işğalci ukümeti, em ukümetke bağlı olmağan teşkilâtlarnı, em de mustaqil kütleviy haber vastalarını muntazam sürette bastırıp, qırımtatarlar, etnik ukrainler, Ukraina tarafını tutqan faaliyetçiler, vatandaşlar toplulığınıñ azaları ve jurnalistlerge qarşı siyasiy maqsatnen yapılğan taqipler ve repressiyalarnı qullandı.

Bu cinayetlerni aydınlatmağa devam etken cesür şahıslarğa qol tutıp, Rusiyeni tınç toplaşuvlar, söz, din serbestliği kibi esas insan aqlarına riayet etmege çağıramız .

Ukrainanıñ bağımsızlığına ve halqara seviyede tanılğan sıñırlarda territorial bütünligine qol tutqanımıznı qayd etemiz. Qırım Ukrainanıñ bir qısımıdır ve Rusiye yarımada üzerindeki kontrolini Ukrainağa qaytarmağance Qırımğa qarşı sanktsiyalarımız devam etecektir’’.