2014 senesi çiçek ayınıñ 15-de ”Ukrainanıñ vaqtınca işğal etilgen topraqlarında vatandaşlarnıñ aq-uquqlarını temin etüv ve uquqiy tertip aqqında” 1207-VII sanlı Ukraina qanunı amelge keçti.
Yuqarıda añılğan qanun Rusiye Federatsiyasınıñ silâlı istilâsı neticesinde vaqtınca işğal etilgen Ukraina topraqlarınıñ statusını tanıdı, mahsus uquqiy tertipni belgiledi ve devlet akimiyeti organları, öz-özüni idare etüv organları, şirketler, müessiseler ve teşkilâtlar tarafından böyle şaraitte yürsetilecek faaliyetniñ, insan ve vatandaş aqlarına ve serbestliklerine, uquqiy şahıslarnıñ aq-uquqlarına ve menfaatlarına riayet etüvniñ ve olarnı temin etüvniñ hususiyetlerini belgiledi.

İşbu qanunnı qabul etken Ukraina parlamenti böyleliknen Qırım MC ve Aqyar şeeriniñ vaqtınca işğal etilüvi şaraitlerinde vatandaş aqlarını yerine ketirüv ve vatandaş aqlarına riayet etüv meselelerini ve işğal esnasında yarımadadaki akimiyet organları nasıl şaraitlerde faaliyetlerini yürsetecegini belgiledi.

Ukraina akimiyeti Ukrainanıñ vaqtınca işğal etilgen topraqlarda yaşağan Ukraina vatandaşlarına Ukraina Esas qanunı ve diger Ukraina qanunları, halqara añlaşmalar ile kefil etilgen insan ve vatandaş aqlarına ve serbestliklerine riayet etilmesine hızmet etecek bütün vastalarnı qullanmaq ve işbu vatandaşlarnen iqtisadiy, maaliyeviy, siyasiy, içtimaiy, informatsion, medeniy ve başqa türlü bağlarnı saqlamaq mecburiyetini aldı.

Vaqtınca işğal etilgen topraqlarda insan ve vatandaş aq ve serbestlikleriniñ bozulması içün mesüliyet haqara uquqnıñ şart ve esaslarına binaen işğalci devlet Rusiye Federatsiyasına yüklene. Vaqtınca işğal etilgen topraqlarda yaşağan Ukraina vatandaşlarına avtomatik şekilde qabul ettirilgen Rusiye Federatsiyası vatandaşlığı Ukraina tarafından tanılmay ve şahısnı Ukraina vatandaşlığından marum etmey.

Qanunnıñ tolu metini ile bu yerde tanış olmaq mümkün:

https://zakon.rada.gov.ua/laws/show/1207-18#Text

#CrimeaIsUkraine #QırımUkrainadır

 #Qırım #StopRussianAggression