Ukraina Prezidentiniñ Qırım Muhtar Cumhuriyetindeki Temsilciligi / Qırım platforması ofisinde büyük ve mündericeli körüşüv olıp keçti. AB insan aqları boyunca mahsus vekili Eymon Gilmor ve AB eyetleriniñ vekilleri bizge musafirlikke keldiler.
Ukraina tarafından iştirak etkenler:
- Anton Korınevıç – Ukraina Prezidentiniñ Qırım Muhtar Cumhuriyetindeki Daimiy Temsilcisi ve onıñ muavinleri,
- Refat Çubarov – Qırımtatar Milliy Meclis reisi,
- Mustafa Cemilev – Qırımtatar halqınıñ lideri, Ukraina Yuqarı Şurasınıñ deputatı,
- Volodımır Çekrıgin – Qırım aq qorçalayıcı gruppasınıñ idare başlığı.
Körüşüv esnasında Gilmor bey Ukrainanıñ topraq bütünligine ve Qırım ilhaqını tanımamazlıq siyasetine deñişmegen alda qol tutqanını qayd etti. O, Qırım platformasınıñ qurulış sammiti ve Qırım Platforması ofisiniñ teşkil etilüvi Qırımnıñ işğalden azat etilüvine hızmet etecegine ümüt ete. Bugünki körüşüv de, avropalı ortaqlarımıznıñ Qırım yarımadasınıñ işğalden azat etilüvine nasıl yardım ete bileceklerini añlamaq içün teşkil etilgendir. Gilmor bey Qırım platforması sammitinden soñ Qırımda yaqalanğan insanlarnıñ miqdarı artqanı, hususan ağa-qardaş Ahtemovlar ve Nariman Celâl yaqalanğanı, siyasiy mabuslarnıñ ekseriyeti ise qırımtatarlar olğanı sebebinden şahsen raatsızlana. COVİD-19 pandemiyasından evel o, siyasiy mabuslarnen Brüsselde körüşken edi, onıñ içün RF tarafından işletilgen qorqunçlı qıynavlarnı pek yahşı añlay.
Gilmor bey şunı qayd etti: ”AB, Rusiye Federatsiyasını halqara-uquqiy mesüliyetke çektirmek kerek, RF Ukrainağa qarşı tecavüzini toqtatmalı degen fikirde ve Qırımnıñ RF tarafından işğal etilmesini iç bir vaqıt tanımaz. AB Qırımda insan aqları saasındaki vaziyetniñ beterleşkeni aqqında haberdar ve bu malümatlarnı ortaqlarına ve bütün dünyağa darqatmağa devam etecektir”.
Refat Çubarovnı Qırımda insan aqlarınıñ bozuluvı saasındaki vaziyet raatsızlay.
Onıñ aytqanına köre, Rusiye Federatsiyası Qırım yarımadasını küçlü arbiy qalesine çevirmektedir. Bu topraqlarda olarğa ukrain akimiyetine qol tutqan insanlar kerekmey. Böyle insanlarnıñ sayısına qırımtatarlar ve etnik ukrainler kire. Yüz bergen deşetli sıqıştırma aslında adamlarnı Qırımdan quvıp çıqarmaqta. İşğalci Rusiye akimiyeti Qırımnı öz müstemlekesine çevire, Qırımğa bir millionğa yaqın RF vatandaşı köçürildi.
Mustafa Cemilev, NKVD insanlarnı qıynap, olarnı işlemegen cinayetlerde özlerini qabaatlı tanımağa mecbur etkeni aqqında hatırlattı. Qırımdaki Ukraina vatandaşlarına nisbeten aynı usullar işletile. İğalciler iç bir vaqıt tınçlıq ve barışıqqa kefil olmaz.
Mustafa Cemilev şunı qayd etti: ”Meclis tek demokratik usullarnen qarşılıq köstermege qarar etti. Onıñ içün Meclis muavini Nariman Celâl, Asan ve Aziz Ahtemovlarnı sañki gaz borusını patlatqanlarında qabaatlav saçma-sapan laflardır”.
Anton Korınevıç, Temsilcilik ve onıñ terkibinde ayrı bir bölük olaraq çalışqan Qırım Platforması Ofisi işğal etilgen Qırımda insan aqları saasında vaziyetni daimiy sürette nezaret etkenini, işğal etilgen topraqlarda vatandaşlarımıznıñ aq-uquqlarınıñ bozulmasına yol bermemek maqsadınen devletimiz tarafından yapılması kerek adımlarnı, qanunlarnı talil etkenini qayd etti. Temsililk icra akimiyetniñ merkeziy organlarınen, elçihanelernen ve halqara teşkilâtlarnen bağ tutmaqta.
Daimiy Temsilci Qırım Platforması Ofisiniñ içki ve halqara treklerini tafsilâtlı şekilde tarif etti. «Qırım habı» vazifesini becergen Ofis avuştırılğan çeşit türlü Qırım akimiyet organlarınıñ, Ekspertler ağı azalarınıñ ğayretlerini birleştirüv, beraberlikte vatandaşlarnı qabul etüv, yerli ve halqara ekspertlerniñ iştiragi ile Qırımnı işğalden azat etüv ve ğayrıdan integratsiya etüvge bağışlanğan tedbirlerni keçirüv içün hızmet etecektir.
Gilmor beyge ve onıñ eyetine işbu körüşüvge kelgenleri ve Qırımda ve Ukraina vatandaşları arasında insan aqları içün küreşmege azır olğanları içün minnetdarlığımıznı bildiremiz.