Oktyabrnıñ 10-11 keçer gecesi Rusiyeniñ işğalci akimiyetiniñ cezalandırıcı küçleri Bahçisaray rayonınıñ tınçlıqsever sakinlerini qamaçavğa aldı. Bir qaç qırımtatar halqnıñ vekili yaqalandı, Rusiyeniñ teşviqatçı mabuat vastaları olarnı endi ”terrorist” olaraq adlandırıp etiştirdi.

Ukraina vatandaşlarına böyle lağap yalıñız olarnıñ Ukrainada qanuniy şekilde faaliyetini yürsetken, amma bircoq başqa diniy teşkilâtlar kibi Rusiyede yasaq etilgen teşkilâtına tahminiy aitligi esasında berildi. Tınçlıqsever Ukraina vatandaşlarını FSBniñ cezalav toqmağı toqtamayıp ura. Bunı insaf ve utanma duyğularını tamamen coyğan işğalci akimiyet özüniñ büyük yeñişi kibi köstermege tırışa. Bu ise, yalıñız insan aq-uquqlarına degil, evelki zamanlarda tecavuzcı devlet içün muim olğan bir sıra halqara vesiqalarnen pekiştirilgen şahsiy azatlıq, şahsiy masuniyet, fikir ve söz serbestligı kibi degerlerge tecavüzleridir.

Bundan ğayrı, böyle areketler işğal olunğan topraqlarğa nisbeten cenk qaideleriniñ ciddiy bozuluvı, yani muddet sınırları olmağan halqara cinayettir. Mesuliyetke yalıñız tecavuzcı devletniñ reberleri degil, olarnıñ şubesiz cinaiy emirlerini yerine ketirgen zemaneviy politsay ve gestapo hadimleri de çekilecektir.

Bu cinayetler içün olarnı qaçılmaz ceza beklemekte. İşğalcilerniñ ve olarnıñ Qırımdaki omuzdaşlarınıñ konkret cinayetleriniñ araştıruvı ve cedvelge alınuvı bütün lâqayt olmağan adamların boyun-borçlarıdır. Tecavuzcınıñ işğal olunğan topraqlardaki kerçek maqsadına ve bu maqsadqa irişmek içün yapılğan deşetli cinayetlerine halqara cemaatınıñ diqqatını tolusınen celp etmek içün bütün mümkün olğan areketler yapılacaq.