Qıynav ve başqa insafsız, insaniyetsiz ya da aqaretleyici davranışlar ve cezalavlar boyunca BMT Mahsus maruzacısı Nils bey Melzerniñ Ukrainağa (2018 senesi qural ay 28 – ilk yaz ayı 8 künleri) resmiy ziyaretiniñ neticesi olaraq, o 2018 senesi ilk yaz ayı (iyün) 11 künü Qırımda qıvnavlar ve insafsız davranışlar boyunca mütenasip qaralama közetüvlerni ve tevsiyelerni beyan etti.

Ukrainağa ziyaretke azırlanır eken, Mahsus maruzacı, BMT Baş Assambleyasınıñ 68/262, 71/205 ve 72/190 qararlarına binaen, Ukrainadan Qırım MC-ni ziyaret etmek içün mütenasip ruhset istep aldı. Amma maruzacınıñ ziyaretini RF akimiyeti ile uyğunlaştırmaq intıluvlarğa cevap olaraq, işğalci devlet bu ziyaretni Qırımnı RF-nıñ bir qısmı olaraq qabul etip kerçekleştirmek talap etti, çünki böyle adımnıñ BMT memurı tarafından yapılması imkânsız olğanını RF akimiyeti pek yahşı añlay. Onıñ içün, RF-nıñ talabı sebebinden, Mahsus maruzacı Ukrainağa ziyareti çerçivesinde Qırımğa barıp olamadı.

Mahsus maruzacı, rusiye uquq qoruyıcı organları tarafından qıynavlarğa ve insaniyetsiz davranışlarğa maruz qalıp, Qırım MC-ni terk etmege mecbur olğan adamlarnen körüşti. Mahsus maruzacısı alğan malümatlarğa köre, qırımtatarlar 2014 senesi saban ayında keçirilgen ‘‘referendumnı’’ körmemezlikke urğanları içün, daa çoq takip etile, böyle areketler ‘‘terrorizm ile küreş’’ dep adlandırıla. Maküm etligenlerniñ ve makemeden evel yaqalanğanlarnıñ büyük qısımı RF-na teslim etilgeni aqqında malümat  mahsus maruzacını pek raatsızladı, böyle vaziyet halqara qumanitar uquqnıñ açıq-aydın bozuluvıdır.

Ukrainağa resmiy ziyareti çerçivesinde Qırımğa barıp olamağan Mahsus maruzacı Qırımda qıynavlar ve insaniyetsiz davranışlar adiselerini doğrudan-doqru ve tolu şekilde qayd etip olamadı. Mahsus maruzacı işğalci devletni, halqara mecburiyetlerine riayet etip, bütün Qırım sakinleriniñ aq-uquqlarınıñ qorçalavını temin etmege ve bir de bir ayırımcı davranışlardan ve ameliyatlardan, qanunsız yaqalavlardan, qıynavlardan, sert, insaniyetsiz, insafsız, aqaretleyici davranışlardan ve cezalavlardan vazgeçmege çağırdı.

Bundan da ğayrı, Mahsus maruzacı RF-nı mustaqil, tarafsız halqara uquq qorçalayıcı taqımlarnıñ Qırımğa acele ve maniasız irişimini temin etmege israr etip çağırdı. Jeneva konventsiyalarnıñ 3-ci umumiy maddesine binaen, Mahsus maruzacı Ukrainada davanıñ bütün taraflarını, uquqiy statuslarına baqmadan, Jeneva konventsiyanıñ başqa maddelerini, kerek olsa, mahsus anlaşmalar vastasınen yerine ketirmege, bu cümleden Qızıl Haç Halqara Komiteti içün azatlıqtan marum etilgen bütün şahıslarnı ziyaret etüv imkânını yaratmağa israrlı şekilde çağırdı, er keske belli ki, işğalci devlet vaqtınca işğal etilgen Qırımda al-azırda buña yol bermey.