Devlet akimiyeti organları vekilleriniñ ve cemaat teşkilâtlarında çalışqan adliyecilerniñ iştiragi ile ”Qırımda topraq damartısı mülkiyet aqqını nasıl etip qorçalamalı” mevzusında keçirilgen onlayn munaqaşa esnasında Ukraina Prezidentiniñ Qırım Muhtar Cumhuriyetindeki Daimiy Temsilcisiniñ Birinci muavini Darya Svırıdova şunı qayd etti:
”Topraq damartılarından marum etüv areketleri içün arbiy acet yoq edi, muntazam şekilde yüz bergen böyle areketler yalıñız qanunsız degil, olarğa işğalci akimiyeti vekilleri tarafından işlengen arbiy cinayetler olaraq qıymet kesile.
Bundan ğayrı, işğal etilgen topraqlarda Rusiye pasportlarını almağan vatandaşlarımızğa böyleliknen basqı yapılıp, olar RF vatandaşlığını almağa mecbur etile. Asılında, işğalci memleket vatandaşlarımıznı öyle şaraitlerge qoya ki, Rusiye vatandaşlığı olmağan şahıslar öz mülkiyetini qorçalap olamay. Asılında mülkiyet Qırım yarımadası topraqlarına qanunsız şekilde avuşqan RF vatandaşlarına onı teslim etmek maqsadınen zapt etile.
Vatandaşlarımıznı vaqtınca işğal etilgen Qırımda olarnıñ mülkiyetlerinde bulunğan topraq damartılarını zapt etüv adiseleri ya da ıntıluvlarını qayd etip, mıtlaqa Ukraina uquq qorçalav organlarına, şu cümleden, Qırım MC Prokuraturasına ya da işğalci memuriyetniñ qurbanlarını qorçalamaq maqsadınen vatandaşlardan kelgen bu kibi muracaatlarnı al-azırda sistematik şekilde toplağan Ukraina Prezidentiniñ Qırım MC-deki Temsilciligine muracaat etmege çağıramız.
Hatırlatamız ki, 2020 senesi saban ayınıñ 20-de RF Prezidentiniñ 201 sanlı Fermanı ile üzerinde ecnebiy devlet vatandaşlarınıñ ve vatandaşlığı olmağan şahıslarnıñ mülkiyetinde topraq damartılarınıñ bulunması yasaq etilgen sıñırğa yaqın topraqlar cedveli kenişletildi. Bir-de-bir şahısnıñ mülkiyetinde Fermanğa dair oña ait olması yasaq etilgen damartı bar olsa, saibi mülikyet aqqı peyda olğan kününden itibaren işbu damartını bir yıl içinde yabancılaştırmaq kerek, topraq saibi bunı yapmasa, damartı işğalci mahkemelerniñ qararları esasında zorbalıqnen tutulıp alınacaq. Bu ferman işğalci devlet tarafından ecnebiyler olaraq sayılğan biñlernen Ukraina vatandaşlarına tesir etecek.
Yapıla bilecek areketler aqqında malümatnı bu yerde almaq mümkün:
Telegram ağında https://t.me/CrimeaIsUaBot subet botu
Qırımdaki topraq damartısına RF Prezidentiniñ fermanı tesir etip-etmegeni aqqında soraştırmaq ve mülkiyetni qorçalavğa dair acele uquqiy tevsiye almaq.
Topraq meseleleri boyunca faydalı malümatlar toplağan https://cutt.ly/vcrzOvr İnternet saifesi
Bundan ğayrı, Qırım Muhtar Cumhuriyeti ve Aqyar şeeri Prokuraturası ve İnsan aqları boyunca Ukraina-Helsinki birligi, Qırım_SOS, İnsan aqları boyunca regional merkez kibi cemaat teşkilâtlarına muracaat etmek mümkün.
#CrimeaIsUkraine #QırımUkrainadır
#Qırım #StopRussianAggression