Vaqtınca işğal etilgen Qırımda yaşağan vatandaşlarnıñ tasil aqlarnı yerine ketirüv ve Qırımda yaşağan gençlerni maksimal şekilde qıta Ukrainadaki aliy oquv yurtlarında oquvğa celp etüv – Temsilcilikteki bügünki muşavereniñ esas meseleleridir.

Ukraina Prezidentniñ Qırım MC Temsilcisiniñ Birinci muavini İzet Gdanov keçirgen tedbirde ”Qırım-Ukraina” tasil merkezleriniñ, devlet akimiyeti ve öz-öz-özüni idare etüv organlarınıñ, Devlet migratsiya hızmetiniñ, Ukraina Devlet sıñır hızmetiniñ vekilleri iştirak etti.

Muşavere iştirakçileri paylaşqan problemli meseleler arasında memuriy sıñırdan keçüvni, memleket içinde köçken şahıs malümat kâğıdınıñ resmiyleştirilüvini, Ukraina qanun çıqarıcı senetlerge tasil meseleleri boyunca aktual deñişmelerniñ kirsetilüvini qayd etmege mümkün.

Muşavereniñ neticesi olaraq mevcüt olğan meselelerni çezecek operativ ştabnı teşkil etmege, ”Qırım-Ukraina” tasil merkezleri vastasınen kiriş imkânları aqqında haber kampaniyasını quvetleştirmege, yuqarıda qayd etilgen leyhağa tıbbiy aliy oquv yurtlarını celp etmege, Qırımda yaşağan talebelerni ukrain tilli muitke daldırmaq içün kerekli şaraitler yaratmağa qarar alındı.

Muşavere iştirakçileri kiriş kampaniyası esnasında areketlerini uyğunlaştırmağa añlaştılar.