2018 senesi ilk qış (dekabr) ayı 14 künü Avropa Birliginiñ ”Ukrainada coğrafik işaretlevler tertibatına qol tutuv” leyhası çerçivesinde vaqtınca işğal etilgen Qırım yarımadasında ukrain coğrafik işaretlevlerni qorçalav meselesi boyunca munaqaşa olıp keçti.

Munaqaşada AB Leyhasınıñ reisi ve hadimleri, Ukraina iqtisadiy inkişaf ve ticaret Nazirliginiñ, Ukraina agrar siyaseti Nazirliginiñ ve Ukraina Prezidentiniñ Qırım MC Temsilciliginiñ vekilleri iştirak etti.

Munaqaşa esnasında Rusiye tarafından ”Qırım” işaretleviniñ qanunsız alda işletilüvine yol bermemek maqsadınen şaraplar içün Cenübiy Ukrainanı ve işğal etilgen Qırımnı qısmen qaplap alğan umumiy coğrafik işaretlevni meydanğa ketirüv ve resmiyleştirüv meselesi muzakere etildi.

Bundan ğayrı, ukrain şarap istisalcılar içün yerli saktsion cedvelini teşkil etüv ve milliy sanktsiyalarnı avropalı sanktsiyalarnen uyğunlaştıruv, Qırımda işğalden evel şarap istisal etken ukrain devlet ve şahsiy şirketlernen olarnıñ coğrafik isaretlevlerini ğayrıdan tiklevniñ imkâniyeti ve Qırımda işğalci memleket ketirgen zararlarınıñ tazminatı boyunca vekâletli halqara mahkeme müessiselerine muracaat etüv kibi meseleler muzakere etildi.

Körüşüvniñ neticesi olaraq, Ukrainanıñ vaqtınca işğal etilgen Qırımda işğalci akimiyet tarafından ukrain coğrafik işaretlevlerniñ işletilüvine yol bermemek maqsadınen akimiyet organları içün umumiy areketler strategiyasınıñ zaruriyeti aqqında qarar qabul etildi.