2018 senesi çiçek ayı (aprel) 3 künü Ukraina Prezidentiniñ Qırım MC Daimiy Temsilciliginde informatsion-analitik hızmetiniñ reberi Svitlana Tkaçenko vaqtınca işğal etilgen Qırımdan kelgen, yarımadadan mecburen köçken şahıslarnıñ mülkiyet, içtimaiy, ya da tasil-medeniy aqlarına riayet etüvge qol tutmaq ve Temsilcilikniñ informatsion-analitik ve yönetici faaliyetini mükemmelleştirmek maqsadınen Kirovoğrad vilâyeti devlet memuriyetindeki mütenasip bölükleriniñ reberiyeti ile körüşti.

Körüşüv devamında Qırımdan memleket içinde Ukrainanıñ cenübiy regionlarına köçip kelgen şahıslarnıñ vaqtınca meskenniñ berilüvi, 2018 senesi kiriş kompaniyası çerçivesinde tasil hızmetlerge irişim, keyfiyetli tıbbiy yardımnıñ imkâniyeti, işke yerleşüvge qol tutuv, içtimaiy hızmetlerniñ alıcılarını belgilev kibi esas meseleleri muzakere etildi.

Körüşüvniñ neticesi olaraq, Qırımda yaşağan abituriyentlerge aliy oquv yurtlarnıñ faaliyetleri aqqında haber etüv, aliy oquv yurtlarınıñ mütenasip içtimaiy reklamasını işlep çıqaruv, ‘‘Qırım-Ukraina’’ leyhası çerçivesinde muvafaqiyetli kiriş kompaniyasını teşkil etüv boyunca taraflar bir fikirge keldi.