2019 senesi çiçek (aprel) ayı 12 künü Qırım MC ve Ayqar şeerinde umumiy orta tasil yurtlarını bitirgen vatandaşlarınıñ Herson vilâyetindeki aliy, mahsus ve zenaat oquv yurtlarğa kiriş meseleleri boyunca operativ ştabınıñ birinci oturışı olıp keçti.
Oturışnıñ esas maqsadı – vaqtınca işğal etilgen Qırım sakinlerini Ukraina oquv yurtlarına kiriş imkânları aqqında haberdar etmek ve 2019 senesi ”Qırım-Ukraina” tasil merkezleriniñ faaliyetini devam ettirmektir.
Mayıs (qural ay) 11 kününe vaqtınca işğal etilgen topraqlarda yaşağan balalar içün Herson devlet deñiz akademiyası temelinde aliy oquv yurtları Açıq qapılar kününü planlaştırdı.
- İlk yaz (iyün) ayı devamında vilâyette Qırımda yaşağan Ukraina vatandaşları içün Herson vilâyetiniñ aliy, mahsus ve zenaat oquv yurtlarına kiriş boyunca keniş haber kampaniyası keçirilecektir. Tasil meseleleri boyunca em umum devlet, em vilâyet seviyesindeki ”sıcaq ağ” çalışacaq.
- Vaqtınca işğal etilgen Qırım ile memuriy sıñırındaki KÇNN-da baner, levha ve yapraçıq şekilide basılğan içtimaiy reklama yerleştirilecektir. Bundan da ğayrı, Qırım sakinleri içün kiriş kampaniya aqqında malümat regional televizion ve radio kanallarında, devlet akimiyetiniñ ve oquv yurtlarınıñ resmiy saifelerinde, içtimaiy ağlarda aydınlatılacaqtır.
Temsilcilik Qırım sakinleri içün kiriş kampaniyalarnıñ yüksek seviyede teşkil etilmesine qol tuta. Bu senelik kampaniyağa azırlıq olaraq ”Qırım-Ukraina” tasil leyhası çerçivesindeki kiriş kampaniyasınıñ ve oquv yurtlarınıñ video ve audio şekilinde malümatlarına ”içtimaiy reklama” statusını almağa ve işbu içtimaiy reklama içün ilk nevbette vaqtınca işğal etilgen topraqlarğa hızmet etken televizion ve radio kanallarında mahsus kvotalar ayırmağa yardım ete.
Ştab toplaşuvında Temsilcilik apparatınıñ reisi Tetâna Pokidko ve talil-haber hızmetiniñ mesleatçısı Alla Rakşa iştirak ettiler.
Qoşma malümat: 2018 senesi kiriş kampaniyasınıñ neticesi olaraq vaqtınca işğal etilgen Qırım MC topraqlarından oqumağa kelgenlerniñ sayısı evelki yılğa köre 11% artıp, 227 kişini teşkil etti, olardan 66-sı Herson devlet universiteti, Herson milliy tehnikiy universiteti, Herson devlet agrar universiteti ve Herson devlet deñiz akademiyası kibi Herson vilâyetiniñ 4 esas aliy oquv yurtlarına oqumağa kirdiler.
Qırımdan kelgen studentlerniñ ekseriyeti vaqtınca işğal etilgen Qırım MC-den köçürilgen Vernadskiy adına Tavriya Milliy Universitetinde oquy.
Hatırlatamız: vaqtınca işğal etilgen Qırım sakinleri qıta Ukrainada qolaylaştırılğan usulnen ”Qırım-Ukraina” tasil leyhası çerçivesinde 35 aliy oquv yurtına kire bile.
