2018 senesi oraq (iyül) 23 künü Ukraina Prezidentiniñ Qırım MC Temsilciliginiñ baş mesleatçısı Taisiya Tkaçenko ‘‘Desyate kvitnya’’ cemaat teşkilâtınıñ Herson vilâyetinde Ukraina Devlet migratsiya hızmetiniñ reberiyeti ile vaqtınca işğal etilgen topraqlarda yaşağan Ukraina vatandaşlarınıñ vesiqaları meselesi boyunca olıp keçken iş körüşüvinde iştirak etti. Körüşüv esnasında memuriy hızmetlerni berüv saasında al-azırda üküm sürgen normativ vesiqalar muzakere etildi, bu arada pasportları boyunca vaqtınca işğal etilgen topraqlarda qayd etilgen, amma Ukrainanıñ nezareti altında bulunğan topraqlarda yaşap, memleket içinde köçken şahıslar statusını alamağan Ukraina vatandaşlarnıñ meselelerine ayrıca diqqat etildi.

Toplaşuvnıñ iştirakçileri vaqtınca işğal etilgen Qırımda yaşap, on dört yaşını toldurğan şahsılarnıñ Umumiy demografik devlet reestrine kirsetilüvnen bağlı meselelerni muzakere ettiler. Mesele şunda ki, vatandaş Ukrainanıñ nezareti altında bulunğan topraqlarda tasil hızmetlerini alıp, Ukrainanıñ aliy oquv yurtlarında tasilni devam etkende qayd etüv yerini deñiştirse, o avtomatik şekilde içtimaiy tölevlerni almaq ve imtiyazlı şartlarda yataqhanede yaşamaq aqqından marum etile. Körüşüvniñ neticesi olaraq, taraflar böyle tür vatandaşlardan muracaatlarnı bir tertipke ketirip, Qırımdan kelgen Ukraina vatandaşlarını qayd etüv ceryanını mükemmeleştirmek maqsadınen normativ-uquqiy senetlerge deñişüvler yapılması ve bunınen bağlı tekliflerni azırlanması kerek olğanı aqqında añlaştılar.