2018 senesi boş ay (noyabr) 13 künü Ukraina Prezidentiniñ Qırım MC Daimiy Temsilcisiniñ Birinci muavini İzet Gdanov ve Temsilcilikteki hızmetlerniñ baş mesleatçıları Bahşış Kerimov ile Valeriya Pahomova Kıyiv şeer devlet memuriyetiniñ reis muavini Valentın Mondrıyivskiy ile körüştiler.

Körüşüv esnasında vaqtınca yaşayış içün tamirlene bilecek ev-meskenlerni qıdıruv, Qırımdan memleket içinde köçken şahıslarnıñ emek bazarına irişimi, olarnı iş ile temin etüv kibi meseleler muzakere etildi. Kıyivde Qırım aliy oquv yurtlarınıñ faaliyetini ğayrıdan tiklev meselesi de ayrıca köterildi.

Subet esnasında İzet Gdanov memleket içinde köçken şahıslar Temsilcilikke muracaat etken yerli akimiyet organları seviyesindeki problemli meselelerni tarif etti. Valentın Mondrıyivskiy öz nevbette Kıyiv şeerinde Qırım aliy oquv yurtlarını ğayrıdan tiklemek teşebbüsine qol tuttı ve Kıyiv şeer akimiyeti Temsilcilik ile beraber yuqarıda qayd etilgen meseleler üstünde çalışmağa azır olğanını bildirdi. Körüşüvniñ neticesi olaraq, taraflar işbirliklerini devam ettirmege añlaştılar.