2018 senesi ekim (oktâbr) ayı 22 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikteki halqara alâqalar hızmetiniñ reisi Yevgen Samuha Ukraina milliy ‘‘Ukrinform’’ haber agentliginiñ binasında keçirilgen ‘‘Qırımnı qaytaruvğa ukrainalılarnıñ baqışı’’ tögerek masada iştirak ettiler, tedbir esnasında İlk Kuçeriv adına ‘‘Demokratik teşebbüsler’’ Fondu Razumkov merkeziniñ içtimaiyat hızmeti ile beraberlikte 2018 senesi arman ayı 16-22 künleri keçirgen umummilliy soravnıñ neticeleri taqdim etildi.
Tedbirniñ teşkilâtçıları – Ukraina çetel işler Nazirliginiñ Cemaat şurası ve Ukraina Prezidentiniñ Qırım MC Temsilciligi yanında Ekspertler şurası, iştirakçileri arasında ise Ukraina halq deputatı, Qırımtatar Milliy Meclisiniñ reisi Refat Çubarov, Ukraina haber siyaseti Naziriniñ Birinci muavini Emine Ceppar, İlk Kuçeriv adına ‘‘Demokratik teşebbüsler’’ Fondunıñ ilmiy müdiri Oleksiy Garan, cemaat teşkilâtlarınıñ ve ekspert muitiniñ vekilleri bulundılar.
Tedbirniñ iştirakçileri yuqarıda qayd etilgen soravnıñ esasında işğal etilgen Qırımnıñ Ukrainağa qaytarıluvınıñ cemiyette aktualligini ve kelecekte yarımada etrafında vaziyetniñ imkânı olğan inkişafını, Ukraina tarafından yapılması kerek olğan adımlarnı, muhtariyetniñ topraqlarını eñ yaqın vaqıtta qaytarmaq içün Ukrainanıñ ve onıñ halqara ortaqlarınıñ areketlerinı ve Qırımnı Ukrainanıñ terkibine ğayrıdan integratsiyası boyunca ukrainalılarnıñ fikirlerini muzakere ettiler.
Emine Ceppar öz nevbette yarımadanı haber ceetten ğayrıdan integratsiyası boyunca strategiyasını Ukraina Nazirler Şurası tarafından tasdıq etüv boyunca faaliyeti, Refat Çubarov – Esas qanun komissiyası terkibindeki iş gruppasınıñ neticeleri aqqında ikâye ettiler.
Yuqarıda qayd etilgen soravnıñ neticelerni talil etüv esnasında Borıs Babin ukrainalılarnıñ ve bu cümleden işğal etilgen Qırım sakinleriniñ allarına menfiy tesir etken meselelerge diqqat çekti. Bu cümleden, büyük ukrainalı iş adamlarına işğal etilgen Qırımda çalışmağa imkân bergen serbest iqtisadiy zonanı qanuniy seviyede lâğu etmek, qırımlılar içün memuriy sıñırğace yolcu naqliyatını teşkil etüvnen bağlı olğan logistik meselelrni al etmek, akimiyet organlarında vaqtınca işğal etilgen topraqlar boyunca kadrlar meselesini çezmek lâzimdir. Daimiy Temsilci yarımdada işğalci akimiyet ile işbirlik yapqan şahıslar içün kerçek cezaiy mesüliyetni belgilemek kerek olğanını qayd etti ve Temsilcilikniñ Qırımnı işğalden azat etüv oğrunda keniş faaliyetiniñ şimdiki neticelerine yekün çekti.
