Halqara cemiyet, añlaşmalar ve nizamnameler ile belgilengen doğru qaidelerge riayet etip yaşamağa alışqandır.
Rusiye Federatsiyası ise olardan degil.
Onıñ içün şimdi mümkün olğanı qadar er halqara meydançıqta qaidelerge, hususan bazı halqara vesiqalarda yazılğan ve halqara cemiyetniñ bütün azaları tarafından riayet etilgen halqara aq-uquqnıñ esas ilkelerine riayet etilmesi kerek olğanını añlatmalımız”, – ”Qırım platforması – işğal soñunıñ başlanğıcımı?” mevzusındaki muzakere etüvde uzaqtan iştirak etken Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç bu aqta laf etti ve bir çoq başqa meselelerni de köterdi.
Tedbir Viyanada ekim ayınıñ 21-de olıp keçti.
Munaqaşada Ukrainanıñ Lehistan Cumhuriyetindeki Elçisi Andriy Deşçitsâ ve Lehistan Cumhuriyeti Prezidenti Kantselâriyasındaki Devlet kâtip, Halqara siyaset bürosınıñ reberi Yakub Kumoh, yetekçi halqara ekspertler, diplomatlar iştirak etti.
Munaqaşalar Qırım platforması sammitiniñ neticelerine ve Ukraina ile halqara cemiyetniñ yarımadanı işğalden azat etüv oğrundaki adımlarına bağışlanğan edi.
Anton Korınevıç tedbir iştirakçilerine, Qırım platformasınıñ çoq seviyede muntazam ve daimiy şekilde alınıp barılacaq faaliyet olğanını añlattı. Al-azırda müim neticeleri de bardır:
Sammit neticeleri boyunca qabul etilgen Qırım Platforması beyannamesini 43 devlet ve 3 halqara teşkilât imzaladı.
Sammit iştirakçileri Rusiyeniñ areketlerini ve Qırım yarımadasınıñ işğal etilüvini taqbih ettiler. Olar, Ukrainanıñ egemenligine, siyasiy mustaqilligine ve territorial suvlarnen beraber halqara cemiyet tarafından tanılğan sıñırlarda topraq bütünligine deñişmegen alda qol tutqanlarını tekrarladılar.
«Qırım habı» vazifesini becergen Qırım platforması Ofisi avuştırılğan çeşit türlü Qırım akimiyet organlarınıñ, Ekspertler ağı azalarınıñ ğayretlerini birleştirüv, beraberlikte vatandaşlarnı qabul etüv, yerli ve halqara ekspertlerniñ iştiragi ile Qırımnı işğalden azat etüv ve ğayrıdan integratsiya etüvge bağışlanğan tedbirlerni keçirüv içün hızmet etecektir.
Müim meselelerni kötergen tedbirniñ teşkilâtçıları Instytut Wolności та Ambasada Ukrainy w Rzeczypospolitej Polskiej/Ukrainanıñ Lehistan Cumhuriyetindeki Temsilciligine minnetdarlığımıznı bildiremiz.