2018 senesi ekim (oktâbr) ayı 12 künü Temsilcilikteki halqara alâqalar hızmetiniñ reisi Yevgen Samuha ve baş mesleatçısı Valeriya Pahomova ‘‘Ukrainada coğrafik işaretlev tertibatına qol tutuv’’ serlevalı AB leyhasınıñ üyken eksperti Horhe Huyerta-Goldman ve kiçik eksperti Olena Nazarenko ile körüştiler.

Temsilcilikniñ hadimleri Temsilclikniñ vazifelerini bildirdiler, qanun yaratıcılıq saasında kündelik faaliyetini, qırımlılarnıñ muayyen meseleleriniñ çezilüvi, Qırımğa yaqın olğan rayonlarda memuriy hızmet merkezleriniñ açıluvı boyunca Temsilclikniñ areketlerini muzakere ettiler.

Ekspertler Leyha ve onıñ esas vazifeleri aqqında ikâye ettiler, bu cümleden, leyha Ukraina ve Avropa Birligi arasındaki Añlaşmanıñ coğrafik işaretlevlernen bağlı olğan maddelerini yerine ketirüvge qol tuta.

Esas vazifeleriniñ arasında ukrain şarabı, alkogol içimlikleri, koy hocalığı ve aşayt malları istisalcılarına coğrafik işaretlevlerini resmiylestirüvde qol tutuv ve işaretlev içün AB coğrafik adları işletilgen mallarnı tasvir etüv boyunca istisalcılarğa tevsiyeler berüvdir. Bundan da ğayrı, Leyhanıñ ekspertleri coğrafik işaretlev boyunca Ukraina qanuniyetini mükemmelleştirüv, onı AB şartları ile uyğunlastıruv üzerinde çalışalar. Leyhanıñ esas ortaqları Ukraina iqtisadiy inkişaf ve ticaret Nazirligi ve Ukraina agrar siyaseti Nazirligidir.

Körüşüv esnasında Qırımda işğalden evel şarap istisal etken ukrain devlet ve şahsiy şirketlerni, olarnıñ coğrafik isaretlevlerini ğayrıdan tiklevniñ imkâniyeti ve Qırımda işğalci memleket ketirgen zararlarınıñ tazminatı boyunca vekâletli halqara mahkeme müessiselerine muracaat etüv muzakere etildi. Şaraplar içün qıta Ukraina toprağını ve işğal etilgen Qırımnı qısmen qaplap alğan umumiy coğrafik işaretlevni meydanğa ketirüv ve resmiyleştirüvniñ istiqbaline ayrıca diqqat etildi. Körüşüvniñ neticesi olaraq, taraflar kelecekte işbirlikniñ yolları aqqında añlaştılar.