2018 senesi fevral 7 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Boris Babin işğalci akimiyetniñ muntazam sürette halqara uquqnı bozması ve Qara deñizde deñizcilikni havf altına qoyması sebebinden iş körüşüvni keçirdi.
Keñeşte Ukraina infrastruktura nazirliginiñ, Vaqtınca işğal etilgen territoriyalar ve memleket içinde köçip kelgenler meseleleri boyunca nazirlikniñ, Naqliyatta havfsızlıq boyunca Ukraina devlet hızmetiniñ, ‘‘Deñiz limanları memuriyeti’’ devlet şirketiniñ, Qırım MC Savcılığınıñ ve Ukraina havfsızlıq hızmetiniñ Qırım MC ve Aqyar şeeri boyunca baş idaresiniñ vekilleri iştirak etti.
Er teşkilâtnıñ vekili mecliste bulunğanlarğa öz vekâleti çerçivesinde işbu mesele boyunca faaliyetleriniñ neticelerini bildirip, Temsilcilikniñ reberiyeti tarafından qoyulğan suallerge cevap berdi.
Muzakere devamında yük taşığan gemilerniñ muntazam sürette Ukrainanıñ Qırım CM-de ve Aqyar şeerinde qapatılğan limanlarına kirmelerine, bu limanlarda ve deñiz boşluqlarında navigatsiya vastalarınıñ işletilüvinen ve deñizcilik saasında hafsızlıqnen bağlı başqa bozuluvlarğa, deñiz çevresiniñ kirlenüvine, işğalci akimiyet tarafından yarımadada bulunğan Ukraina limanlarınıñ işletilmesine acele sürette qarşılıq kösterüv kibi meseleler baqıldı.
Ukraina bayrağı altında yaldağan gemilerniñ Keriç körfezinden keçkende mevcüt olğan havflar da muzakere etildi. İşğalci memleket Qara deñiz regionındaki limanlarnıñ nezareti boyunca özara añlaşuv aqqında Memorandumni suistimal etmesi sebebinden işbu Memorandum Komiteti terkibinde Ukrainanıñ vekaletli organlarınıñ bulunması meselesi de köterildi.
Vaqtınca işğal olunğan Qırımnıñ etrafında deñizcilik esnasında yüz bergen deñiz aq-uqunıñ bozuluvı saasında Halqara deñiz teşkilâtı ve Deñiz havfsızlığı boyunca Avropa agentligi ile işbirlikniñ qaviyleştirilmesi muzakere etildi.
Muzakere esnasında halqara ve milliy qanuniyetniñ bozuluvı içün sigorta, kadro, sınıflandırma şirketleriniñ vekillerini, ticariy gemilerniñ saiplerini, operatorlarnı ve kapitanlarını mesüliyetke çekme meselesi de muzakere etildi.
Toplaşuvda bulunğanlarğa muracaat etken Boris Babin işğalci akimiyetke qol tutqan teşkilâtlarğa, bu cümleden, olarnıñ qıta Ukrainada faaliyet yürsetken vekillerine qarşı mütenasip isbatlayıcı temelniñ azırlanuvında işbirlikke çağırdı.
Keñeşniñ neticesi olaraq, toplaşuv iştirakçilerine yuqarıda qayd etilgen ve başqa nuqsanlıqlarnıñ yoq etilmesi içün mümkün olğanı qadar qısqa vaqıt müddeti berildi, malümat almaşuvınıñ devirleri ve mütenasip nazirlikler arasında işbirlik yolları belgilendi. Mezkür meseleler Temsilcilikniñ daimiy nezareti altında bulunmaqta.