2018 senesi ekim (oktâbr) ayı 12 künü Temsilcilikteki halqara alâqalar hızmetiniñ baş mesleatçısı Valeriya Pahomova ‘‘Halqara advokatsiya ve qırımtatar halqı ile birdemlik ruhunı başlatuv’’ mevzusında Qırımtatar resurs merkezi ile Estoniya insan aqları institutınıñ matbuat konferentsiyasında iştirak etti.
Tedbirde Qırımtatar resurs merkezi idaresiniñ başlığı, Qırımtatar Milliy Meclisiniñ azası Eskender Bariyev, Estoniya insan aqları institutınıñ eksperti Oliver Loode, ressam, dizayner Andriy Yermolenko, İrlandiya Cumhuriyetinde ukrain cemiyetiniñ vekili Mıkola Krutsık çıqışta bulundılar.
Konferentsiyada #LIBERATECRIMEA halqara teşebbüsi taqdim etildi. İşbu leyhanıñ maqsadı qırımtatar halqına qol tutuv ve Qırımnı işğalden azat etüv oğrunda halqara cemaat ruhını başlatuvdır.
Ukraina Prezidentiniñ Qırım MC Temsilciligi leyhanı amelge keçirüvde faal yardım ete, yuqarıda qayd etilgen cemaat teşebbüsine qol tuta, yarımadada yaşağan, ya da qıtağa köçken qırımlılarnıñ ihtisaslarını yükseltüvde faal iştirak ete. Bu cümleden, Temsilcilikniñ reberiyeti ve hadimleri cemaat teşkilâtları ile beraberlikte Ukrainanıñ nezareti altında bulunğan topraqlarda Qırımdan kelgen abulkatlar, adliyeciler ve faalciler içün ‘‘İnsan aq-uquqlarını universal qorçalav vastaları’’ mevzusında bir sıra seminarlarnı keçirdiler. Temsilcilikniñ hadimleri Qırımdan memleket içinde köçken şahıslar içün aq-uquqları ve şahsiy havfsızlıq boyunca treningte, Qırımtatarlar halq ögünde keçirgen diplomatiya Akademiyasınıñ ‘‘Liberate Crımea’’ maarif lagerindeki Ekinci yıllıq toplaşuvında iştirak ettiler.
Bundan da ğayrı, matbuat konferentsiyasında ‘‘Bayraq ile birleştirilgenler – #LIBERATECRIMEA’’ serlevalı aktsiyanıñ başlanması aqqında haber etildi. İşbu aktsiya çerçivesinde qırımtatar milliy bayrağı çeşit türlü din ve milletlerge mesüp olıp, Ukrainanıñ ve qırımtatar haqınıñ taqdirlerine lâqayd qalmağan insanlarnı birleştirmek maqsadınen 9 ay devamında dünyanıñ çeşit türlü memleketlerini ziyaret etecek. İşbu bayraq ilk yaz (iyün) ayı 26 künü Qırımtatar milliy bayraq kününde Kıyiv şeerine qaytacaqtır. Temsilcilik yuqarıda qayd etilgen aktsiyağa qoşulıp, qırımlılarğa öz tileklerini yazdı.