Ukraina çetel işler Nazirliginde qırımtatar halqı sürgünliginiñ 77-yıllığı munasebetinen belli ukrain ressamı Yuriy Himiçniñ ”Qırım eskilik yadikârlıqları” serlevalı sergi açıldı. Açılış merasiminde Mustafa Cemilev, Nazir Dmıtro Kuleba, sergi içün mesüliyetli Birinci nazir muavini Emine Caparova, Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korıneviç ve onıñ muavinleri Darya Svırıdova ve Tamila Taşeva, Qırımtatar Milliy Meclisiniñ reisi Refat Çubarov, Qırım Muftisi ve Qırım musulmanları diniy idaresiniñ reisi Ayder Rustemov, mitropolit Yepifaniy, din adamları, cemaat ve matbuat vastalarınıñ vekilleri iştirak etti.

Yuriy Himiçniñ ”Qırım devresine” (1953-1983) ait olğan 77 resimi Qırım güzelliklerini tasvirley.

Yuriy Himiç (1928-2003) – mimariy manzara üslübinde icat etken belli ukrain ressam-neomodernist, XX asır ukrain tasviriy sanatınıñ klassigidir. Ukrainada nam qazanğan ressam ve mimardır. 50-nci seneleriniñ soñunda o devirniñ eñ güzel akvarel ressamlarından biri sayıla edi. Onıñ üslübini sanatşınaslar nazmiy kerçeklik olaraq tanıylar. 1950-1983 seneleri Yuriy Himiç Qırım mimariy abidelerine bağışlap, kölemi ceetinden unikal ve ustalığı ceetinden nadir grafik ve güzel manzaralı eserler toplamını meydanğa ketirdi. Qırım devresi qalem, çini merekebi, akvarel, guaş, tempera, renkli bor kibi çeşit türlü bediy vastalarnen onğa yaqın grafik ve güzel manzaralı eserler toplamlarını birleştire. Qırım devresinde neomodernist üslübi ile başqalardan ayırılğan ”Bağçasaray” toplamı merkeziy yerni almaqtadır.