Oktyabr 18 künü 2017 senesi Ukraina Prezidentiniñ Qırım Muhtar Cumhuriyetindeki Daimiy Temsilcisiniñ birinci muavini İzet Gdanov, Kordoba Konferentsiyasınıñ ve Vena şeerinde ANIT Deklaratsiyasınıñ 10-yıllığına bağışlanğan, Avropa Havfsızlıq ve İşbirlik Teşkilâtınıñ (AHIT) Demokratik institutlar ve insan aqları boyunca bürosı (DİİAB) tarafından yüksek seviyede keçirilgen «Musulmanlarğa qarşı nefret, duşmanlıq ve ayrımcılıq numayışlarınıñ ögüni aluv» serlevalı konferentsiyada iştirak etti.

Konferentsiya iştirakçilerniñ ögünde çıqışta bulunğan ve muzakerelerde iştirak etken İzet Gdanov, iştirakçi memleketlerniñ temsilcilerine, ANIT azalarına ve halqara mütehassıslarğa vaqtınca işğal olunğan Ukraina toprağı Qırımda işğalci memleket qırımtatar halqınıñ milliy, medeniy ve diniy aqlarını bozğanını tarif etti.

İlk nevbette Daimiy Temsilcisiniñ muavini işğalci rus akimiyeti tarafından «aşırıcılıqta» esassız qaabatlanğan cemaatlar ve qırımtatar halqınıñ liderleri taqip etilgenini qayd etti, işğalci akimiyet qırımtatar halqınıñ diniy ayatını nezaretke almağa toqtamadan tırışqanına toplaşuvda bulunğanlarnıñ diqqatını çekti.

Bundan da ğayrı, İzet Gdanov AHITnıñ diqqatına makemeden tış qırımtatar faalcileriniñ idamlarına, qıyınlavlarına ve hırsızlanuvlarına misal ketirdi ve işğalci rus idareleri Qırımda yürsetken propaganda faaliyetinde qullanğan nefret tili ve dinler arası duşmanlıqnıñ qozğaluvınıñ delillerini taqdim etti.
Prezidentniñ Temsilciligi, halqara konferentsiyanıñ neticesinde peyda olğan tevsiyelerge Rusiyeniñ qırımtatar halqına qarşı yapqan cezalav areketlerini takbih etken maddeniñ kirsetilmesine imkân yaratti.

AHIT Demokratik institutlar ve insan aqları boyunca bürosına, iştirakçi memleketlerniñ eyyetlerine ve halqara mütehassıslarğa Konferentsiya munasebetinen azırlanğan tekliflerimizni taqdim etemiz.