Litva Cumhuriyetiniñ Prezidenti Dalya Gribauskayte qırımtatar halqınıñ liderleri, Qırımtatar Milliy Meclisiniñ reis muavinleri Ahtem Çiygoz ve İlmi Umerov ile körüşüv keçirdi. Körüşüvde Litva Tatar cemiyetleri Birliginiñ başlığı Adas Yakubauskas iştirak etti. Körüşüvniñ maqsadı Qırım işğaliniñ neticesinde zarar körgen qırımtatar halqına qol tutmaqtır.

Prezident Dalya Gribauskayte Litva Qırımnıñ işğalini qattı sürette takbih etkenini ve printsipial şekilde onı qabul etmegenini bir kere daa qayd etti. Avropa Birligi tarfından qabul etilgen sanktsiyalarnıñ işğal etilgen topraqlarnıñ istilâcı tarafından boşatılmasına qadar devam etmesine de qol tuta.

Bundan da ğayrı, Dalya Gribauskayte qırımtatarlarnıñ vaziyetleri pek müşkülleşkeni ve olarnıñ aq-uquqları qaba şekilde bozulğanı içün, devamlı taqipler, zorbalıqnen ruslaştırma, söz, din ve matbuat serbestlikleriniñ sıqıştırıluvı içün Rusiye mesuliyetli olğanını qayd etti. Bu sebepten Rusiyeniñ qırımtatarlarğa qarşı duşmaniy siyaseti aqqında malümat halqara cemiyetniñ diqqat merkezinde bulunması içün Litva qolundan kelgenini yapa. Litva Cumhuriyetiniñ Prezidenti qırımtatarlarnı inkişaf maqsadınen işbirlik programmalarında iştirak etmege davet etti. 2017 senesi Litva qırımtatar teleyayınlarınıñ çıqarıluvına ve Qırımdan memleket içinde köçken şahıslarnıñ integratsiyasına maddiy yardım köstergen edi.