2018 senesi oraq ayı (iyül) 19 künü BMT Halqara Mahkemesi Ukraina çetel işler Naziriniñ Avropağa integratsiya boyunca Muavini Olena Zerkalge, Terrorizmge maddiy destek kösterüv ile küreş boyunca halqara könventsiyasını ve Irqçılıqnıñ bütün şekillerini yoq etüv boyunca halqara konventsiyanı işletüv meselesi (Rusiyege qarşı Ukrainanıñ davası) boyunca vaqtınca toqtatuv tedbirlerniñ işletilüvini maqsat qoyğan BMT Halqara Mahkemesiniñ 2017 senesi çiçek ayı 19 künü qabul etilgen qararınıñ Rusiye tarafından yerine ketirilüvi boyunca resmiy mevamını bildirldi.

Belli olğanı kibi, bu Qarar ile Mahkeme istilâcı devletke ‘‘qırımtatar halqını temsil etken teşkilâtlarnı, bu cümleden, Meclisni saqlamaq aqqına toqunmamağa’’ emir etken edi. Rusiye bu açıq-aydın Qararnı qaba şekilde bozıp, Meclisniñ qanunsız yasaq etilüvi aqqında Qırımdaki işğalci akimiyet tarafından birinci kere 2016 senesi çiçek (aprel) ayında qabul etilgen yasaqnı, 2017 senesi bazı Meclis azaları tarafından bu Qararnı RF adliyesi çerçivesinde yerine ketirmek ıntıluvlarına baqmadan, lâğu etmedi. Onıñ içün davanıñ eki tarafına mektüp yazğan BMT Halqara Mahkemesi, bu Qararnıñ yerine ketirilüvi vacip olğanını bir kere daa hatırlattı ve Rusiye Federatsıyasına 2019 senesi qara qış (yanvar) ayı 18 kününe qadar Mahkemege bu Qararnıñ yerine ketirilüvi boyunca yapqan muayyen adımları aqqında bildirmege emir etti.  

Ukraina çetel işler Nazirligniñ bu mesele boyunca Beyanatında qayd etilgeni kibi, Halqara Mahkemeniñ qararını Rusiye körmemezlikke urğanınen razı olmaq mümkün degil. Ukraina BMT Halqara Mahkemesi 2017 senesi çıqarğan ve keçenlerde bir kere daa tasdıqlağan Qararğa binaen, iç bir türlü şart qoymadan Rusiye Federatsiyasını öz halqara mecbüriyetlerini yerine ketirmege çağıra.