2021 senesi çiçek ayınıñ 1-de vaqtınca işğal etilgen topraqlarnı ğayrıdan integratsiya etüv ve içtimaiy siyaset meseleleri boyunca Ükümet komitetiniñ oturışuvında mütenasip akimiyet organları, Qırımtatar Milliy Meclisi, mütenasip ilmiy ve tasil müessiseler, cemaat teşkilâtları, ekspertler ve şu cümleden vaqtınca işğal etilgen Qırım MC ve Aqyar şeerinde yaşağan mütehassıslar ile işbirlikte Vaqtınca işğal etilgen topraqlarnı ğayrıdan integratsiya etüv meseleleri boyunca Ukraina Nazirligi tarafından işlep çıqarılğan Qırımtatar tilini inkişaf ettirüv Kontseptsiyasınıñ leyhasına qol tutuldı.
Kontseptsiya Ukraina Prezidenti 2021 senesi kiçik aynıñ 26-da imzalağan ”İşğal etilgen Qırım Muhtar Cumhuriyeti ve Aqyar şeeri topraqlarınıñ işğalden azat etilüvi ile ğayrıdan integrasiya etilüvini maqsat etip qoyğan ayrı tedbirler aqqında” 78/2021 sanlı Fermannı amelge keçirüv çerçivesinde işlep çıqarıldı.
Ukraina Prezidentiniñ Qırım Muhtar Cumhuriyetindeki Temsilciligi Kontseptsiyanı işlep çıqaruvğa qoşuldı ve mesele Ükümet komitetinde baqılğanda, integratsiya Nazirliginiñ tekliflerine qol tuttı.
Kontseptsiya Ükümet tarafından qabul etilgen soñ, nevbetteki adım 2022-2032 seneleri içün qırımtatar tilini inkişaf ettirüv Strategiyasını ve onı amelge keçirüvge dair tedbirler planını işlep çıqaruv olacaqtır.
Vaqtınca işğal etilgen topraqlarnı ğayrıdan integrasiya etüv meseleleri boyunca Nazir muavini Rostıslav Zamlınskıynıñ qayd etkenine köre, Kontseptsiya çerçivesindeki tedbirler Ukrainanıñ tamır halqlarından biri olğan qırımtatarlarnıñ tili institutsional, maliyeviy, informatsion ve başqa qullanılğan saalarnı kenişletmek, başqa millet vekillerinde qırımtatar tilini ögrenüvge aveslik doğumaq, qırımtatar tilini hususan gençler arasında rağbetleştirmek kibi vazifelerni maqsat etip qoyğan, böleyliknen em qırımtatar tiliniñ saqlanıp inkişaf ettirilmesi, em de halqara seviyede tanılğan sıñırlar içerisinde Ukraina topraq bütünliginiñ ve devlet egemenliginiñ ğayrından tiklenmesi içün şaraitler yaratılır.
Kontseptsiyada qayd etilgeni kibi, UNESCO tarafından yapılğan sınıflaştırmada (UNESCO Atlas of the World’s Languages in Danger, 2010) qırımtatar tili ciddiy telüke altında bulunğan tillerden biridir (severely endangered languages). Amma Ukraina Milliy İlimler Akademiyası terkibindeki A.Y. Krımskiy adına Şarqşınaslıq institutı mütehassıslarınıñ qayd etkenlerine köre, soñki bir qaç yıl içinde yüz bergen menfiy vaqialar sebebinden qırımtatar tili ciddiy yoq oluv telükesi altında bulunmaqtadır (critically endangered languages).
Qırımtatar tilini canlandıruvnen bağlı faaliyet, böyle tillerni ğayıp etüv meselelerine diqqat celp etmek maqsadınen 2019 senesi ilk qış ayınıñ 2-de BM Baş Assambleyası tarafından alınğan 74/396 sanlı qarar ile ilân etilgen Halqara tamır halqlar onyıllığı çerçivesinde yürsetilecektir.