2018 senesi arman ayı (avgust) 22 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikte halqara alâqalar hızmetiniñ baş mesleatçısı Taisiya Tkaçenko, Halqara Qızıl Haç Komitetiniñ Odessadaki ofisiniñ reberi Anastasiya Marçuk ile körüşüvleri devamında memleket içinde köçken şahıslar ve vaqtınca işğal etilgen Qırımdan kelgen Ukraina vatandaşları içün qıta Ukrainada, bu cümleden, Herson vilâyetinde lâyıq şartlarnı yaratuvnen bağlı bir sıra meselelerni muzakere ettiler.
Anastasiya Marçuk Qızıl Haç Halqara Komitetiniñ Herson vilâyetinde ve bu cümleden Qırımğa yaqın olğan rayonlarda Ukraina Qızıl Haç Teşkilâtı ile sıqı işbirlikte alıp barılğan faaliyetni taqdim etti. Qızıl Haçnıñ böyle faalieyetine memleket içinde köçken şahıslarğa gumanitar yardım ve ruhiy-içtimaiy qol tutuv, öz doğmuşlarını qıdırğan qorantalar içün aileviy bağlarnı belgilevde yardım ve göñüllilerniñ faaliyeti içün kurslarnıñ ve treninglerniñ keçirilüvi kirmekte.
Ukraina Qızıl Haç Teşkilâtınıñ faaliyeti aqqında malümatlarnı KÇNN-da yerleştirüv ve mütenasip informatsıon tahtalarnıñ Qırım sakinleri tarafından kütleviy şekilde ziyaret etilgen Herson şeerindeki ‘‘Dokument’’ Devlet müessisesinde yerleştirüviniñ imkânları muzakere etildi. Daimiy Temsilci Qırımdan memleket içinde köçken şahıslarnıñ artuvına diqqatnı celp etti ve bu artuvnıñ esas sebeplerini qayd etti. ‘‘Qırım-Ukraina’’ leyhası çerçivesinde qolaylaştırılğan usulnen aliy oquv yurtlarına oqumağa kirgen Qırımdan studentlerniñ artuvı sebebinden yüz bergen gumanitar meseleler de muzakere etildi. Borıs Babin KÇNN-da acele yardım noqtalarını teşkil etip, olarnı kerekli tıbbiy vastalarnen temin etmege, bundan ğayrı, suvuq vaqıtta qızınuv noqtalarnı qurmağa kerek olğanına da diqqatnı celp etti.
Ayrıca vaqtınca işğal etilgen topraqlarda, bu cümleden, Qırımda habersiz ğayıp olğan şahıslarnıñ meselesi, işğalci akimiyet tarafından gumanitar uquqnıñ bozuluvı ve Aqmescit şeerinde bulunğan Qızıl Haç ofisiniñ faaliyeti sebebinden peyda olğan sualler muzakere ettildi.
Habersiz ğayıp olğan insanlarnıñ qıdıruvında Qızıl Haç Halqara Komitetiniñ rölü ve uquq qorçalav organlar içün trening ve ögretici seminarlarniñ keçirilüvi de muzakere etildi. Bundan ğayrı, 2018 senesi oraq (iyül) ayında qabul etilgen ‘‘Habersiz ğayıp olğan şahıslarnıñ uquqiy statusı’’ 2505-VIII sanlı Ukraina qanunına yüksek qıymet kesildi. Qara ve Azaq deñizleriniñ suvlarında Rusiyeniñ qanunsız areketleriniñ quvetleşmesi de muzakere etildi.