Noyabr 16 künü Ukraina Prezidentiniñ Qırım Muhtar Cumhuriyetindeki Daimiy Temsilcisi Borıs Babin, Daimiy Temsilciniñ Birinci muavini İzet Gdanov ve vaqtınca işğal olunğan topraqlardan köçken vatandaşlarnıñ meseleleri boyunca hızmetniñ reisi Maksim Kojemyaka Qızıl Haç Halqara Komitetiniñ ofis başlığı Maksim Zabaluyev, onıñ yardımcısı Anastasiya Marçuk ve Ukraina Qızıl Haç teşkilâtınıñ Herson vilâyetindeki bölüginiñ yolbaşçısı Andriy Pasika ile körüştiler.

Körüşüv devamında memleket içinde köçken şahıslarğa ve vaqtınca işğal olunğan Qırım toprağından kelip ketken adamlarğa yardım ve destek kösterüv meseleleri ve işbu vatandaşlarğa qoltutuv içün başlatılğan programma ve leyhalarda işbirlik muzakere etildi. Temsilcilikniñ Qırım sakinlerine yardım etüv saasında imkânları ve muvafaqiyetleri bildirildi.

Bundan da ğayrı, körüşüv devamında taraflar Ukrainada Qızıl Haç Halqara Komiteti reberiyetinen körüşüv imkânını muzakere ettiler.