2025 senesi avgustnıñ 20-nde rusiye federatsiyası ükümeti tarafından “Ceza sistemasınıñ inkişafı (2018–2035 ss.)” federal maqsadlı programmasına deñişmelerni tasdıqlağan 1240 sayılı qarar qabul etildi. Vesiqada Qırım Muhtar Cumhuriyetiniñ vaqtınca işğal etilgen territoriyasında ceza infrastrukturasınıñ büyük ölçüde kenişletilmesi aqqında aytıla.

Programma çerçivesinde Rusiye akimiyeti 366 yerli qoşma taqiqat izolâtorı ve eki basamaqta umumen 1500 yerlik yañı izolâtor qurmaqnı, bir koloniyağa 20 kamera odası qoşıp, onı tamir etmekni, em de mahkümlerni mecburiy işlerge teşviq ettirmek içün 85 tane istisal donatıluvı satın almaqnı planlaştıra. Bu leyhalarnı ömürge keçirmek içün rusiye federatsiyasınıñ federal bücetinden 16,61 milliard ruble ayırıldı, olardan 15,36 milliard ruble doğrudan-doğru yañı taqiqat izolâtorı qurulmasına berile.

rf ükümeti bu tedbirlerni yarımadadaki SİZO-larda mümkün olğan yer qalmamasınen esaslandıra (işğalcilerniñ bildirgenine köre, Qırımdaki SİZO-larnıñ tolulığı 103% teşkil ete). 2035 senesine qadar çalışacaq programma rusiye federatsiyasınıñ bütün topraqlarında, şu cümleden Ukrainanıñ vaqtınca işğal etilgen bölgelerinde cezahanelerniñ qurucılığını ve rekonstruktsiyasını qaplap ala, amma Qırımda qurucılıq 2026 senesinden 2030 senesine qadar planlaştırıla.

Ukraina Prezidentiniñ Qırım Muhtar Cumhuriyetindeki Temsilciligi rf-niñ Ukrainaniñ işğal etilgen topraqlarında yapqan qanunsız areketlerini takbih ete. Yañı apishanelerniñ qurulması halqara gumanitar uquqnıñ ve işğalci devletke işğal etilgen topraqnıñ astyapısını ve ealisine qarşı repressiyalarnı quvetleştirgen şekilde qanunlarını deñiştirmege yasaq etken Dördünci Jeneva şartnamesiniñ bozuluvıdır.

Bu planlar rusiye federatsiyasınıñ repressiya siyasetiniñquvetleşmesi ve avgustnıñ 25-nde rusiyeniñ Avropa İşkencelerge ya da insaniyetsiz, menlikni aşalağan muamele ya da cezalarnıñ aldını aluv sözleşmesinden çıqması temelinde ömürge keçirile. Bu qarar mabüslerniñ tutuv şaraitleri boyunca halqara nezaretten çekilmege istegenlerini köstere ve işğal etilgen Qırımda insan aqları içün havflarnı arttıra.

Temsilcilik halqara cemiyetni Ukrainanıñ vaqtınca işğal etilgen topraqlarında insan aqları bozuvlarını ve qanunsız faaliyetniñ toqtatılması içün rusiye federatsiyasına siyasiy basqını arttırmağa çağıra.