Oturışuv esnasında siyasiy mabuslardan biri olğan Farhod Bazarov ana qırımtatar tilinde delillerini ketirmege başladı. Abulqatı, onıñ rus tilini yaramay bilgenini ve tercimanğa muhtac olğanını añlattı. Mahkemeci ise Bazarovnıñ bu şekilde öz aqlarınen suistimal etkenini qayd etti, neticede mahkeme siyasiy mabusnı mahkeme ceryanından çetleştirmege qarar aldı. Bazarovğa qol tutmağa istegen başqa qırımtatar mabuslar da qırımtatar tilinde sübetleşmege başladı. Bundan soñ mahkeme qararı ile oturışuv salonından Remzi Bekirov, Riza İzetov, Rayim Ayvazov ve Şaban Umerov da çıqarıldı.
Ukraina Prezidentiniñ Qırım Muhtar Cumhuriyetindeki Temsilciligi işğalci memuriyetler tarafından vaqınca işğal etilgen topraqlarda yaşağan Ukraina vatandaşlarına qarşı açılğan er bir davanı diqqatnen taqip ete. Rus ”femidası” yarımadada qorqu ve işançsızlıq müitini yaratmaq, mabuslarğa basqı yapaq, olarnı qabaatlarını tanımağa mecbur etmek içün er angi bir fırsattan faydalana.
Rusiye Federatsiyası işğal şaraitlerinde tamır qırımtatar halqınıñ aq-uquqlarına, qırımtatar medeniyetiniñ ve tiliniñ serbest inkişaf etilüvine tek sözde riayet etkenini bugün biz bir kere daa kördik. Aqiqatta ise mahkemede özüni qorçalamağa istegen mabuslar ana tillerini qullanıp olamaylar. Olar yalıñız işğalciniñ tilinde laf etmege mecbur etile, tercimannı davet etmege rica etken mabuslar ise mahkeme ceryanından çetleştirileler. Böyle vaziyet Rusiye Federatsiyasınıñ bir-de-bir birdemlikni aselet yoq etmege tırışqanını ve vatandaşlarnı milliy, siyasiy ve diniy alâmetler boyunca taqip etkenini bir kere daa köstere. Temsilcilik taqımı Ukraina vatandaşlarını taqip etüvnen bağlı er bir adiseni qayd ete ve elde etilgen malümatlarnı ukrain uquq qorçalav organlarına teslim etip, halqara teşkilâtlarınen muzakere ete”, – dep izaatladı oturışuvnı Ukraina Prezidentiniñ Qırım MC-deki Daimiy Temsilcisiniñ muavini Tamila Taşeva.
Hatırlatamız ki, bugün Rusiyedeki Rostov-na-Donu şeerinde Ukraina vatandaşları, qırımtatar faalleri, siyasiy mabuslar Remzi Bekirov, Riza İzetov, Rayim Ayvazov, Şaban Umerov ve Farhod Bazarovğa qarşı mahkeme ceryanı başlandı. Siyasiy sebeplerden açılğan dava boyunca olar sözde terroristik teşkilâtında iştirak etkenlerinde qabaatlana.