📅 Çiçek ayınıñ 1-de vaqtınca işğal etilgen Qırım MC ve Aqyar şeeri topraqlarında Rusiye Federatsiyası kene Ukraina vatandaşlarını qanunsız şekilde arbiy hızmetine çağırmağa başladı. Olarnıñ ekseriyeti Qırım yarımadasınıñ sıñırlarından tış Cenübiy ve başqa arbiy okruglarnıñ arbiy bölüklerine yollanılacaqtır.

Rusiye Federatsiyasınıñ silâlı quvetlerinde hızmet etmege faal şekilde çağırğan sözde ”arbiy komissarlarnıñ” faaliyetleri aqqındaki haberlerniñ sayısı ket-kete arta.

İşğalci devletniñ bu kibi areketleri muntazam sürette işlengen arbiy cinayet olğanını qayd etemiz, pandemiya vaqtında kerçekleştirilgen çağıruv ise insanlarnıñ sağlıqlarını ve ayatlarını daa büyük telükege oğrata.

❗ Vaqtınca işğal etilgen topraqlarnıñ ealisini işğalci devletniñ silâlı quvetlerine çağıruv, Qırım topraqlarında RF Silâlı Quvetlerine muntazam şekilde teşviq etüv ve vaqtınca işğal etilgen topraqlarda yaşağan Ukraina vatandaşlarını RF topraqlarına avuştıruv cenk vaqıtında grajdan ealini qorçalavğa dair Konvetsiyanı bozğanı aqqında hatırlatamız.

Rusiye Federatsiyasınıñ Qırımdaki qanunsız çağıruv areketleri ve çağıruvdan qaçınğan vatandaşlarımıznı kriminal vastalarnen taqip etüv halqara cemiyet tarafından takbih etildi ve şu cümleden BM teşkilâtınıñ Baş Assambleyası tarafından 2019 senesi ilk qış ayınıñ 18-de ve 2020 senesi ilk qış ayınıñ 16-da qabul etilgen ”Qırım Muhtar Cumhuriyeti ile Aqyar şeerinde insan aqları saasındaki vaziyet” mevzusında (https://undocs.org/en/A/RES/74/168; https://undocs.org/ru/A/C.3/75/L.32) Qararnamelerde aks etildi.

⚖️ Aynı vaqıtta yuqarıda añılğan cinayetlerni Qırım MC ve Aqyar şeeri Prokuraturası taqiq etip, halqara teşkilâtları ile beraber RF-nıñ Qırımdaki arbiy cinayetleri ve şu cümleden işğalci devletniñ silâlı quvetlerine zorbalıqnen çağıruv aqqındaki malümatlarnı Halqar Ceza Mahkemesi Prokuror Ofisine yollaylar.

📢 İşğalci devletniñ silâlı quvetlerinde hızmet etmege mecbur etilgen Ukraina vatandaşlarına muracaat etip, qanunsız çağıruvlar aqqında haber etmelerini rica etemiz. Toplanğan deliller arbiy cinayetlerden zarar körgen vatandaşlarımıznı qorçalamağa ve aynı vaqıtta Qırımdaki qanunsız çağıruvlar aqqında malümatlarnı toplap, işbu cinayetlerni işlegen şahıslarnı şu cümleden halqara seviyede cezalamağa yardım eter.

Malümat ve aqlarıñıznıñ qorçalanmasına dair muracaatlarıñıznen aşağıdaki müessiselerge buyurıñız:

📌 Qırım Muhtar Cumhuriyeti ve Aqyar şeeri Prokuraturası:
+38(044) 596 73 57;
telegram, viber, whatsapp: +38 (096) 700 1600;
e-mail: [email protected],
https://www.facebook.com/prok.arkrym

📌 Ukraina Prezidentiniñ Qırım MC-deki Temsilciligi:
0 800 502 192, +38 (0552) 49-59-39;
Skype: ark predstavnictvo,
e-mail: [email protected],
https://www.facebook.com/ppu.gov.ua

Qanunsız çağıruv aqqındaki infografikanı

Qırım aq qorçalayıcı gruppası azırladı.