Qırım ve Aqmescit Mitropoliti Klıment sözde ”Qırım Cumhuriyeti boyunca Federal icra idaresinden” memuriy bozuluv aqqında yañı yazılı tenbi aldı, o, sözde ”’Kezlev şeer mahkemesiniñ” qararını yerine ketirmegeninde, Kezlevdeki Ukraina Ortodoks Kilisesiniñ ağaçtan yasalğan ‘‘Yanmaz Kupina’’ ibadethanesini bozmağanında qabaatlana.
”Mahkemeniñ” qararı yerine ketirilmegeni sebebinden 2020 senesi boş aynıñ 3-de ”Kezlev boyunca üyken icra memurı” V.N. Moroz Ukraina Kilisesini ibadethanesini bozmağanda qabaatlağan ve 30 biñ ruble miqdarında cöremeniñ tölenmesini talap etken qarar çıqardı. İlk qış ayında işbu qararğa 50 biñ rublelik cöreme ve Kezlevdeki ”Yanmaz Kupina” ibadethanesiniñ bozulması içün 2020 senesi ilk qış ayınıñ 3-ne qadar berilgen yañı müddetni belgilegen daa bir protokol qoşuldı.
Ukraina Prezidentiniñ Qırım MC-deki Temsilciligi işğalci devlet Rusiye Federatsiyası tarafından Ukraina Ortodoks Kilsesiniñ Qırım yeparhiyası ve onıñ cemaatına qarşı yapılğan cinayetlerni takbih ete. Sözde” mahkemeniñ qararı ve Kezlevdeki ”Yanmaz Kupina” adında ibadethaneniñ bozulmasını talap etilmekniñ maqsadı, vaqtınca işğal etilgen Qırımda Ukraina Kilisesiniñ yoq etilüvidir.Rusiye Qırımda ukrainalılarnı birleştirgen ukrain kilisesiniñ bar olmasını istemey. Temsilcilik al-azırda Ukraina Qırım Muhtar Cumhuriyeti ve Aqyar şeeri Prokuraturasına muracaat etip, Ukraina Ortodoks Kilsesiniñ Qırımda taqip etilmesine dair yañı malümatlarnı teslim etti. Temislcilik Rusiye Federatsiyası ve onıñ işğalcı memuriyetleri tarafından diniy serbestliklerni bozuv saasında yapılğan cinayetler munasebetinen davalar açqan Qırım uquq qorçalayıcıları ile daimiy bağ tutmaqta.Taqımımız Ukraina Otodoks Kilisesiniñ qorçalanması içün bütün mevcut olğan vastalarnı işletecek: Qırımda diniy serbestlikler muntazam şekilde bozulğanına, Ukraina Ortodoks Kilisesiniñ mülkiyetine el qoyulğanına dair malümat diplomatik müessiserge ve halqara teşkilâtlarğa taqdim etile, bozuluvlarğa dair malümat toplanıp qayd etile, mütenasip maddeler BM teşkilâtınıñ Qırımğa dair er yıllıq qararnamesine kirsetildi. Baş assambleyanıñ Üçünci Komiteti qararname leyhasını taqdirledi, ilk qış ayında onıñ qabul etilmesini bekleymiz”, – dep bildirdi Ukraina Prezidentiniñ Qırım MC-deki Daimiy Temsilcisi Anton Korınevıç.
Hatırlatamız ki, 2020 senesi oraq ayınıñ 23-de Rusiye işğalcileri Ukraina Ortodoks kilisesiniñ Qırım yeparhiyası Mitropoliti Klımentten Kezlevdeki ibadethaneni yoq etmege talap ettiler. Sözde ”Kezlev şeer mahkemesi” 2019 senesiniñ boş ayında yarımadanıñ Rusiye tarafından işğal etilmesinden evel ağaçtan qurulmağa başlağan ibadethaneniñ yıqtırılması aqqında qarar çıqardı: ‘‘Meryem ana adına diniy cemiyetten ve Ukraina Ortodoks kilisesiniñ Qırım yeparhiyasından üzerinde qurulğan binanı yıqıp, 30,25 kvadrat metr meydanlığındaki topraq arsasını boşatmağa talap etile”, – dep haber etile işğalci ”mahkemeniñ” qararında.