2020 senesi bos aynıñ 3-de Qırım ve Aqmescit Mitropoliti Klıment sözde ”Qırım Cumhuriyeti boyunca Federal icra idaresinden” 2020 senesi boş aynıñ 3-nece Kezlevdeki Ukraina Ortodoks Kilisesiniñ ağaçtan yasalğan ibadethanesini bozıp, 50 biñ ruble miqdarında cöreme ödemek talabını aldı.
Ukraina Prezidentiniñ Qırım MC-deki Temsilciligi işğalci devlet Rusiye Federatsiyası tarafından Ukraina Ortodoks Kilsesiniñ Qırım yeparhiyası ve onıñ ziyaretçilerine qarşı yapılğan cinayetlerni takbih ete. Sözde ”mahkemeniñ” qararı ve Kezlevdeki ibadethaneni bozmaq talabı Ukraina Ortodoks Kilisesini Qırım yarımadasından quvmaq maqsadına hızmet etmekte. Rusiye Qırımda ukrainalılarnı birleştirgen ukrain kilisesiniñ bar olmasını istemey. Temsilcilik Ukraina kilisesini qorçalamaq maqsadınen qolundan kelgen bütün vastalarnı işletecektir: Ukraina Ortodoks kilisesiniñ Qırımdaki mülkiyetine tecavüz ve din serbestligi aqqınıñ muntazam şekilde bozuluvı aqqında malümat diplomatik müessiselerge ve halqara teşkilâtlarğa yiberile, bozuluvlar aqqında malümat toplanıp, BM Baş Assambleyasınıñ Qırım boyunca er senelik Qararnamesine kirsetilmesi içün taqdim etildi. Ukraina Prezidentiniñ Qırım MC-deki Temsicliligi Rusiye Federatsiyası ve onıñ işğalci memuriyetleri tarafından yapılğan cinayetlerni qayd etip, cinaiy davalar açqan Qırım uquq qorçalav organlarınen daimiy bağ tutmaqta”, – dep qayd etti Ukraina Prezidentiniñ Qırım Muhtar Cumhuriyetindeki Daimiy Temsilcisi Anton Korınevıç.
Hatırlatamız ki, 2020 senesi oraq ayınıñ 23-de Rusiye işğalcileri Ukraina Ortodoks kilisesiniñ Qırım yeparhiyası Mitropoliti Klımentten Kezlevdeki ibadethaneni yoq etmege talap ettiler. Sözde ”Kezlev şeer mahkemesi” 2019 senesiniñ boş ayında yarımadanıñ Rusiye tarafından işğal etilmesinden evel ağaçtan qurulmağa başlağan ibadethaneniñ yıqtırılması aqqında qarar çıqardı.
”Meryem ana adına diniy cemiyetten ve Ukraina Ortodoks kilisesiniñ Qırım yeparhiyasından üzerinde qurulğan binanı yıqıp, 30,25 kvadrat metr meydanlığındaki topraq arsasını boşatmağa talap etile”, – dep haber etile işğalci ”mahkemeniñ” qararında.