Rusiye Federatsiyası BMT Halqara tribunalı qural ay (mayıs) 25 künü qabul etken qararnı yerine ketirip, Keriç boğazı yanında zapt eken ukrain deñizcilerini ve gemilerini azat etmeli.

Bu aqta ilk yaz (iyün) ayı 17 künü Frenkistan Cumhuriyetiniñ prezidenti Emmanuel Makron ile umumiy matbuat konferentsiyasında Ukraina prezidenti Volodımır Zelenskiy haber etti.

”Rusiye Halqara tribunalnıñ qararını yerine ketirmege mecbur olıp, 24 ukrain deñizcisini qaytarmalı ve men buña pek inanam”, dep qayd etti devletniñ başlığı, em de ”Rusiyeniñ Azaq deñizindeki ve Keriç boğazındaki areketlerini qattı ve muntazam şekilde takbih etken Frenkistanğa minnetdarım”, – dep qoştı o.

Bundan ğayrı, Volodımır Zelenskiy Emmanuel Makronğa ukrainalılarnı azat etüv meselesine ayırğan diqqatı içün teşekkürini bildirdi. ”Esirlikke alınğan ve apis etilgen ukrain vatandaşlarınıñ taqdirine ayırğan diqqatı içün prezident Makronğa pek minnetdarım. Olarnıñ episi eñ yaqın vaqıtta azat etilmeli”, – dep qayd etti o.

Devletniñ başlığı, Ukraina öz ortaqlarınen Qara ve Azaq deñizlerinde havfsızlıq boyunca işbirligini devam eteceginde eminlik bildirdi.

”Qara ve Azaq deñizlerinde deñizcilik havfsızlığını ve Keriç boğazından gemilerniñ maniasız keçüvini kefil etmek içün Frenkistan ve NATO azaları olğan başqa ortaqlarımıznen çalışmağa devam etecekmiz”, – dep ayttı prezident.

Emmanuel Markon öz nevbette ukrainalılarnı azat etüv meselesi ozü ve memleketi içün pek muim olğanını, nezaret altında bulunğanını qayd etti. Frenkistan prezidenti olarnı azat etüv oğrundaki ğayretlerge qol tutacağını işandırdı.

”2018 senesi boş (noyabr) ayından berli Rusiyede esirlikte bulunğan ukrain deñizcilerini esimde tutam. Bu esirlerniñ qorantalarını, olarnıñ eñ yaqın kelecekte Ukrainağa qaytmaları içün qolumızdan kelgenini yapacağımızda işandırmağa isteyim”, – dep ayttı Emmanuel Makron.

Menba: https://www.president.gov.ua/news/rosiya-maye-vikonati-rishennya-mizhnarodnogo-tribunalu-j-zvi-55933