Prezident Petro Porşenko qayd etkenine köre, Rusiyege qarşı sanktsıyalar Qırımda ve Donbassta ukrain akimiyeti ğayrıdan tiklenmesine qadar devam etmeli. Ve Rusiye içün istilâsınıñ fiyatı öyle artmalı ki, qanunsız şekilde zapt etilgenini keçindirmek imkânsız olsun.
”Tarihimiz bizni ögrete ki, Rusiyege inanmağa mümkün degil. İç bir şaraitte. Moskovadan er zaman eñ beterni beklemege kerek. Bunı sizge Qırımda ve Donbassta taqip etilgen on binlerce qırımtatarlar ve ukrainalılar tarif eter. Yüzlernen insannı qatiller yalıñız ukrain sözü, ukrain bayrağı, ya da ukrain pasportı içün öldürdi”, – dep qayd etti er sene keçirilgen Yalta Avropa Strategiyasınıñ (YES) ”Bu mı yañı dünya? Ukraina içün o neler ifadeley” serlevalı 14-ci körüşüvinde Ukraina devletiniñ başlığı.
Prezident qayd etkenlerine köre, Kreml öz cinayetlerini tanımamağa devam ete. Bunıñ içün birlik ve beraberlik temin etilmeli.
”Rusiyege qarşı sanktsıyalar Minsk añlaşmalarınıñ tolusınen yerine ketirilmesine ve ukrain akimiyetiniñ Qırımda ve Donbassta ğayrıdan tiklenmesine qadar devam etmeli. İstilâcığa qarşı sanktsılarnıñ quvetleştirilüvi içün AQŞ-na teşekkür etmege isteyim. İstilânıñ fiyatı öyle artmalı ki, qanunsız şekilde zapt etilgenini, daa doğrusı, arsız hırsızlanğanını keçindirmek imkânsız olsun”, – dep qayd etti o.
Devletimiz başlığı Qırımnı unutmaq, ya da Qırım meselesini kerige qoymaq kibi bazı siyasetçilerniñ tekliflerini ”basiretsiz’’ olaraq adlandırdı. O, dünya tertibi içün şimdiki küreş yarımadanıñ işğalinden başlanğanını hatırlattı. ”Onıñ içün aman-aman 2 sene evelsi men Qırımda ukrain akimiyetini ğayrıdan tiklemek maqsadınen halqara mehanizmni teşkil etmege teklif etken edim. Rusiyeniñ Qırımdan barışıq yolnen yavaş-yavaş quvalanması aqqında söz yürsetile’’, – dep qayd etti o. Onıñ aytqanlarına köre, bu yolda bizim ittifaqdaşlarımız – halqara uquqnıñ vastaları, sanktsıyalar, halqara platformalar ve BMT-den UNESCO-ğace (Birleşken Milletler Tasil İlim ve Medeniyet teşkilâtı) nezaret mehanizmleridir.
‘‘BMT çerçivesinde Rusiye işğalci memleket olaraq tanılğanı bizim doğru yolnen ketkenimizni tasdıqlay. Biz er kün Rusiyege onıñ cinayetleri aqqında hatırlatmalımız. Halqara ortaqlarımıznıñ maqsatkâr qoltutuvına işanamız”, – dep qayd etti Prezident.
Ukraina devletiniñ başlığı ortaq adımlarnı yöneltmek maqsadınen Qırımnıñ işğalden azat etilüvi dostlarınıñ halqara alqasını teşkil etmege teklif etti. Petro Poroşenko bu teşebbüsinen New-Yorkta BMT Baş Assambleyasında çıqışta bulunacağını bildirdi.