2018 senesi çiçek ayı (aprel) 26 künü sabadan başlap, Qarasuvbazar şeerinde kütleviy tintüvler keçirile. Rusiye işğalcileri qırımtatar iş adamları, hayırseverleri, milliy areket iştirakçileri olğan Ali Bariyev, Asan Bariyev, Remzi Velilâyev, Resul Velilâyev, Ekrem Velilâyev, Zera Velilâyevanıñ ve olarnıñ ayrı yaşağan yetişken balalarınıñ evlerine tintüv maqsadınen üçüm ettiler.

Tintüvler keçken bütün yerlerde atıcılıq silânen donatılğan mahsus bölüklerniñ küçleri toplanğan, silâlılar tintilgen evlerni sarıp alğanlar. Ameliyatnı Rusiye Federal havfsızlıq hızmetiniñ hadimleri keçire. Qırımdan kelgen malümatqa köre, Qarasuvbazar şeerinde ‘‘QırımOpt’’ şirketiniñ yanında 400-ge yaqın insan toplanğan, qırımtatarlar tintüvler keçirilgen başqa yerlerniñ yanında da toplana ekenler.