2018 senesi ilk yaz ayı (iyün) 27 künü Ukraina Prezidentiniñ Qırım MC Daimiy Temsilcisi Borıs Babin ve Temsilcilikte halqara alâqalar hızmetiniñ baş mesleatçısı Valeriya Pahomova Ukraina Esas qanun Mahkemesinde keçirilgen ‘‘Esas qanunnıñ qıymetleri ve insan aqları: XXI asırnıñ çağıruvları’’ mevzusında Halqara ilmiy seminarda iştirak ettiler. Seminarda Ukraina Esas qanun Mahkemesiniñ Başlığı Stanislav Şevçuk, Ukraina Uquqiy ilimler milliy Akademiyasınıñ Prezidenti Oleksandr Petrişin, Ukraina Prezidenti Memuriyetiniñ Reis muavini Oleksiy Filatov, Ukrainada AHIT leyhalarnıñ Yöneticisi Ceffri Erlih, Gürcistan Esas qanun Mahkemesiniñ Başlığı Tavadze Zaza, Litva Cumhuriyeti Esas qanun Mahkemesiniñ Başlığı Jalimas Deynüs, Poloniya Cumhuriyeti Esas qanun tribunalınıñ qadısı Piskorsi Yüstin, Moldova Cumhuriyeti Esas qanun Mahkemesiniñ Başlığı Tanase Aleksandru, Moldova Cumhuriyeti Esas qanun Mahkemesiniñ qadısı Zaporojan Vâçeslav, Ukraina Esas qanun mahkemesiniñ qadıları, devlet organlarnıñ vekilleri ve alimler iştirak etti. Seminar devamında Ukraina qanuniy tertibi qıymetleriniñ ve temelleriniñ esas nazariy hususiyetleri, olarnıñ manaları ve musaviyligi, esas qanun ve uquq vastasınen insan aqlarını ve serbestliklerni temin etüvde Esas qanun Mahkemesiniñ vazifeleri, vaqtınca işğal etilgen topraqlarda anayasal nezaret ve anayasada pekitilgen insan aqlarnıñ qorçalavı muzakere etildi. Çetelden kelgen musafirler demokratik qıymetlerniñ ve esas aq-uquqlarnıñ qorçalavında Gürcistan Esas qanun Mahkemesiniñ rölü, insan aqlarınıñ ve anayasal kimliginiñ qorçalavı ile bağlı Litva Cumhuriyetiniñ tecribesi, cemiyetni yalan haberlerden qorçalavında Esas qanun mahkemeleriniñ vazifeleri aqqında ikâye ettiler. Çıqışta bulunğan Borıs Babin devam etken rusiye istilâsı ve işğalciler tarafından insan aqlarınıñ kütleviy şekilde bozuluvı şaraitlerinde uquq qorçalav anayasal adliye tertibinde esas rölüni oynağanını qayd etti. Borıs Babin Qırımdan kelip ketken, ya da köçken vatandaşlarnıñ aq-uquqlarını qorçalavda anayasal şikâyet usulı pek semereli olacağından eminlikni bildirdi ve RF sözde uquq qorçalavnı Ukrainağa qarşı tecavüzini quvetleştirmek içün bir manaçıq olaraq qullanğanını hatırlattı.